Vígamenn samtakanna Íslamskt ríki tóku fyrrverandi umsjónarmann rústanna í Palmyra og einn helsta fornleifafræðing Sýrlands af lífi í gær. Khaled al-Asaad hafði verið í haldi samtakanna í um mánuð áður en hann var afhöfðaður fyrir utan safn borgarinnar. Lík hans var svo hengt utan á eina af fornu súlum rústanna.
Al-Assad var 82 ára gamall og hafði séð um þessar tvö þúsund ára gömlu rústir í fjóra áratugi þar til hann lét af störfum árið 2003.
Yfirmaður fornminjastofnunar Sýrlands segir að al-Assad hafi verið einn mikilvægasti frumkvöðull Sýrlands í fornminjafræði á tuttugustu öldinni. Hann sagði einnig að Vígamenn ISIS hefðu reynt að fá hann til að segja þeim hvar helstu fjársjóðir rústanna hefðu verið faldir.
Palmyra féll í hendur ISIS fyrr í maí og síðan þá hefur verið óttast að þeir muni eyðileggja rústirnar, eins og þeir hafa áður gert með sambærilegar minjar í Sýrlandi sem og Írak. Samkvæmt AP fréttaveitunni hafa vígamenn þó eyðilagt styttur í þessum tvö þúsund ára gömlu rústum.
Þá tóku samtökin rúmlega 20 hermenn af lífi í hringleikahúsi rústanna. Þeir voru skotnir til bana af ungum ISIS-liðum fyrir framan fullar áhorfendastúkur af fólki.
Umsjónarmaður Palmyra tekinn af lífi

Tengdar fréttir

ISIS sækir að fornum rústum
Vígamenn Íslamska ríkisins sækja nú að hinni ævafornu borg.

Rústirnar í Palmyra eru heilar – Í bili
Íslamska ríkið birti í dag myndband sem sýnir að þeir stjórna rústunum.

Óttast um fornminjarnar
Vígasveitir Íslamska ríkisins náðu á sitt vald hluta bæjarins Palmyra.

Sprengja forn musteri í Sýrlandi
Íslamska ríkið heldur áfram að sprengja í loft upp ómetanlegar fornminjar

Hafa sprengt tvö forn hof við Palmyra
Vígamenn Íslamska ríkisins hafa birt myndir af eyðileggingunni sem hafa ýtt undir ótta um að hin forna borg sé næst.

ISIS-liðar tóku tuttugu af lífi á sviði hringleikahúss í Palmyra
Böðlar ISIS söfnuðu saman fjölda fólks til að fylgjast með því þegar hermennirnir voru skotnir á sviðinu.

ISIS-liðar sækja hart að fornu borginni Palmyra
Palmyra var stofnuð um tvö þúsund árum fyrir Krist og er á heimsminjaskrá UNESCO.