Þjálfari Minnesota Timberwolves greindist með krabbamein

Flip Saunders, þjálfari og forseti körfuknattleiksdeildar Minnesota Timberwolves, greindist með krabbamein í vor en hann mun halda áfram starfi sínu hjá félaginu meðfram krabbameinsmeðferðinni.

Þetta staðfesti Saunders á blaðamannafundi í gær en hann greindist með krabbamein stuttu fyrir nýliðaval NBA-deildarinnar í júní síðastliðnum.

Saunders hefur verið þjálfari í NBA-deildinni í sautján ár en hann hefur stýrt liðum Minnesota Timberwolves, Detroit Pistons og Washington Wizard og hafa liðin hans unnið 654 leiki af 1246, samtals 52,5% sigurhlutfall.

Saunders tók við stöðu forseta körfuknattleiksdeildar hjá Minnesota Timberwolves í maí 2013 eftir að hafa unnið sem sérstakur ráðgjafi á íþróttastöðinni ESPN. Ári seinna tók hann við þjálfarastöðu liðsins eftir að þáverandi þjálfari, Rick Adelman, hætti störfum sem þjálfari.