Borgarfulltrúi Sjálfstæðisflokksins: Leiðinlegt að stjórnmálamenn hoppi á vinsældavagninn í von um umfjöllun

„Í hvert skipti sem einhverjum er bjargað sem fer yfir Miðjarðarhafið þá hvetjum við aðra til að fara þessa leið,“ segir Kjartan Magnússon borgarfulltrúi Sjálfstæðisflokksins. Nú standa yfir umræður á borgarstjórnarfundi um tillögu borgarstjórnar um viðræður við ríkisvaldið um móttöku flóttafólks.

„Það er ábyrgðarhluti að hvetja fólk til að leggja í þetta ferðalag. Það eru margir sem drukkna á leiðinni og margir verða fórnarlömb glæpasamtaka. Til dæmis eru glæpasamtök stærstur hluti þeirra sem flytur fólk yfir Miðjarðarhafið,“ segir Kjartan og bætir við að gróflega sé brotið á þeim sem leggja í ferðina. Þeim sé troðið í báta líkt og síld í tunnur og rán og nauðganir séu daglegt brauð.

„Það er ábyrgðarhluti að virkja þessa leið inn í Vesturlönd og hvetja þar með fleiri til að fara þessa leið þaðan sem það kvíslast svo um Evrópu með landamæralögreglu á hælunum.“

Tiltölulega fáir flóttamenn geta skapað miki álag á kerfið

Kjartan veltir upp þeirri hugmynd hvort ekki sé rétt að hjálpa þeim sem eru í Sýrlandi og á flótta frá stríðshrjáðum löndum með því að reyna að byggja upp heima fyrir. Þeir sem komist til Evrópu nái aðeins tveimur til þremur prósentum af þeim sem séu á vergangi og séu aðeins brot vandans.

Þrátt fyrir að aðstaða, eða aðstöðuleysi öllu heldur, flóttafólks hafi verið viðvarandi vandamál undanfarin ár varð sprenging í umræðunni nú fyrir skemmstu. Í morgun lýsti forsætisráðherra því yfir að til stæði að koma á fót ráðherranefnd um málefni flóttafólks og hvað Ísland gæti gert í þeim efnum.

„Mér þykir leiðinlegt að sjá hvernig stjórnmálamenn hoppa á þennan vinsældavagn í þeim tilgangi að fá fjölmiðlaumfjöllun. Þess í stað ættum við að ræða málin af yfirvegun og skynsemi og skoða reikningsdæmið heildstætt áður en við stökkvum til og nefnum óraunhæfar tölur,“ sagði Kjartan í ræðu sinni.

Kjartan segir að tillagan sem er til umræðu sé að mörgu leyti vanhugsuð. Hún sé hugsuð til þess að setja pressu á stjórnvöld að taka við fleiri flóttamönnum en fimmtíu án þess að það liggi fyrir hvernig málunum skuli háttað. „Tiltölulega fáir flóttamenn geta skapað mikið álag á kerfið sem síðar getur orðið vatn á myllu útlendingaandúðar.“

Flóttamenn framtaksömustu íbúar landsins

Borgarfulltrúinn nefnir einnig að þeir sem gerast flóttamenn séu oftar en ekki þeir framtakssömustu. Þeir hafi efni á því að kaupa farmiðann í bátinn dýrum dómum en skilji hina efnaminni hins vegar eftir.

„Þetta er siðferðileg spurning. Ef við tökum á móti þeim sem þegar hafa komist yfir hafið þá er verið að gera upp á milli fólks,“ segir Kjartan og heldur áfram. „Vesturlönd eru að laða til sín framtakssamasta fólkið. Það er „brain gain“ að taka á móti fólkinu en hins vegar „brain drain“ fyrir sýrlenska samfélagið sem þarf á öllu sínu efnaða og menntaða fólki til að byggja samfélagið upp að nýju er stríðinu lýkur.“

Tillagan, sem var tekin inn með afbrigðum, er svohljóðandi; „Borgarstjórn samþykkir að óska eftir viðræðum við ríkisvaldið um hlutverk og aðkomu borgarinanr að móttöku flóttafólks og lýsir sig reiðubúna til að leggja sitt af mörkum til að tryggja sem flestum öruggt skjól. Borgarstjóra er falið að hefja viðræðurnar, upplýsa borgarráð um framgang þeirra á meðan viðræðunum stendur og leggja svo útfæðra, tímasetta og kostnaðarmetna áætlun þegar niðurstaða liggur fyrir.“

Fulltrúar allra flokka standa að baki tillögunni en hún var samþykkt nú rétt fyrir klukkan fjögur með fjórtán greiddum atkvæðum. Kjartan Magnússon sat hjá við afgreiðslu hennar.