Sólveig Lára í stuði í sigri Stjörnunnar | Myndir

Stjarnan átti ekki í miklum vandræðum með að leggja Fylki að velli í fyrsta leik vetrarins í Olís-deild kvenna í handbolta í kvöld. Lokatölur 30-22, Stjörnunni í vil.

Anton Brink, ljósmyndari Fréttablaðsins og Vísis, var í TM-höllinni í Garðabænum og tók myndirnar sem fylgja fréttinni.

Sólveig Lára Kjærnested fór mikinn í liði Stjörnunnar í kvöld og skoraði 12 mörk. Helena Rut Örvarsdóttir átti einnig góðan leik en þessi öfluga skytta gerði sjö mörk.

Fylkiskonur byrjuðu leikinn reyndar ágætlega og leiddu framan af. En í stöðunni 3-5 kom frábær kafli hjá Garðbæingum sem skoruðu sjö mörk í röð og komust fimm mörkum yfir, 10-5.

Stjörnukonur bættu hægt og rólega við forskotið og í hálfleik munaði átta mörkum á liðunum, 17-9.

Stjarnan náði 10 marka forystu í byrjun seinni hálfleiks, 20-10, og eftir það var aldrei spurning hvorum megin sigurinn myndi enda.

Árbæingar náðu aðeins að laga stöðuna og minnkuðu muninn í fjögur mörk, 23-19, þegar 13 mínútur voru eftir en þá gáfu Stjörnukonur aftur í og skoruðu fimm mörk gegn einu og komust átta mörkum yfir, 28-20. Þegar lokaflautið gall munaði einnig átta mörkum á liðunum, 30-22.

Patricia Szölösi var markahæst í liði Fylkis með 10 mörk en Thea Imani Sturludóttir kom næst með sex mörk. Restin af liðinu skoraði aðeins sex mörk.

Mörk Stjörnunnar:

Sólveig Lára Kjærnested 12/3, Helena Rut Örvarsdóttir 7, Kolbrún Gígja Einarsdóttir 3, Esther Viktoría Ragnarsdóttir 3, Stefanía Theodórsdóttir 3/1, Nataly Sæunn Valencia 1, Sandra Sif Sigurjónsdóttir 1.

Mörk Fylkis:

Patricia Szölösi 10/6, Thea Imani Sturludóttir 6/1, Þuríður Guðjónsdóttir 2, Ólöf Kristín Þorsteinsdóttir 1, Vera Pálsdóttir 1, Hildur Björnsdóttir 1, Kristjana Björk Steinarsdóttir 1.