Vonar að miðillinn fari í mál við sig

Frosti Logason útvarpsmaður á X-ionu, vandaði miðlinum Önnu Birtu Lionaraki ekki kveðjurnar í þætti sínum Harmageddon í morgun. Frosti kallar skyggnilýsingar hennar algjört frat, hún sé svikamiðill og fúskari sem slíkur.

Frosti fór á skyggnilýsingafund í gærkvöldi og tók sér góðan tíma í Harmageddon til að lýsa reynslu sinni fyrir Mána Péturssyni, félaga sínum í þættinum og svo hlustendum. Hann fór yfir það með tilþrifum hvernig fundurinn gekk fyrir sig, þar sem miðlinum mistókst gersamlega að ná sambandi við handaheima, sem reyndar Frosti er ákaflega vantrúaður á að séu til staðar og lauk erindi sínu á því að gefa skyggnilýsingafundinum hauskúpu.

Ófaglegur miðill

Frosti segir, í samtali við Vísi, að það hafi verið fullt hús í Tjarnarbíói, þar sem skyggnilýsingafundurinn var haldinn, annar slíkur sem haldinn er þar af Önnu Birtu.

„Stundum er talað um svikamiðla, auðvitað eru þeir allir að blekkja en þeir eru misgrófir í því; þetta var hryllilega gróft. Ég vona að þessi kona hafi dug í að kæra mig fyrir þessi ummæli, en þetta var svo ótrúlega svívirðilega rangt hvernig hún fór með þetta. Anna Birta og skyggnilýsingar hennar eru ekki pappírsins virði, algjört frat,“ segir Frosti.

„Ég hef oft velt því fyrir mér hvort miðlar eru óheiðarlegir eða bara haldnir ranghugmyndum en ég myndi segja að þessi manneskja sé fyrst og fremst fábjáni. Ófagleg, þetta var svo lélegt af henni og persónulegar árásir hennar á mig, sem kom þarna eingöngu til að fylgjast með, voru yfirgengilegar,“ segir Frosti, sem gefur miðlinum engan afslátt.

Persónulegar árásir á miðilsfundi

Frosti lýsir því að hann hafi sjálfur reynt að fá Önnu Birtu í viðtal í útvarpsþátt sinn áður en hann fór á skyggnilýsinguna og hún ekki tekið því ólíklega en svo umturnaðist hún í afstöðu sinni; sagði að Sigga Dögg vinkona sín hefði varað sig við Frosta. Skyggnilýsinguna segir Frosti hafa mestan part farið í afsakanir miðilsins fyrir að hafa verið að þiggja fé fyrir miðilsstörf sína, sem Frosta þykir ekki skrítið, því þetta séu hrappsháttur og svikastarfsemi. Í öðru lagi snérist skyggnilýsingafundurinn að verulegu leyti um persónulegar árásir á Frosta og var ekki annað á útvarpsmanninum að heyra að honum hafi beinlínis sárnað það.

„Hún reyndi að niðurlægja mig, fá allan salinn til að trúa því að það væri ég sem væri að eyðileggja fundinn: Að allir andar á stór-Reykjavíkursvæðinu héldu sig í öruggri fjarlægð frá Tjarnarbíói af því að Frosti Logason var staddur í húsinu.“

Hins vegar náði miðillinn lítt sem ekkert að tengja anda að handan við gesti salarins.

Ætlar að fá endurgreitt

Frosti segist ekki hafa séð eftir þessum sex þúsund kalli sem fór í að greiða fyrir miða fyrir sig og kærustu sína, en eftir þessa reynslu hafi hann sett sig í samband við leikhússtjórann og spurt hvernig ætti að bera sig að við það að fá endurgreitt, en miðasala fór fram í gegnum midi.is.

Annars má heyra lýsingar Frosta á þessari upplifun í meðfylgjandi glugga. Þær eru á stundum kostulegar.

Vísir heyrði stuttlega í Önnu Birtu vegna vinnslu þessarar fréttar en hún hafði ekki tök á að tjá sig um málið, að svo stöddu. Þá er vert að geta þess að Frosti er starfsmaður 365, sem er útgefandi Vísis.