Guðmundur Braga hættir hjá Grindavík og Kaninn fer til Suður-Kóreu

Það eru breytingar framundan hjá karlaliði Grindavíkur í körfuboltanum en bæði aðstoðarþjálfarinn og bandaríski leikmaðurinn eru að hætta hjá félaginu.

Grindvíkingar segja frá því á fésbókarsíðu sinni að Guðmundur Bragason þurfi hætta sem aðstoðarþjálfari liðsins vegna anna í vinnu og þá er Eric Wise á leiðinni til liðs í Suður-Kóreu.

„Sökum mikilla anna í vinnu hefur Guðmundur Bragason tilkynnt Stjórn Kkd UMFG að hann geti ekki haldið áfram sem aðstoðarþjálfari hjá meistaraflokki karla. Þó þetta sé vissulega áfall fyrir okkur þá sýnum við Gumma að sjálfsögðu fullann skilning og höldum áfram, við erum jú vissulega með part af honum liðinu," segir hjá síðu Grindvíkinga sem munu treysta á það að Guðmundur haldi áfram að hvetja liðið áfram enda spila tveir synir hans með liðinu.

„Gummi mun þó öskra liðið áfram úr stúkunni þegar hann getur og aðstoða lítið eitt við það sem upp getur komið. Við viljum þakka Gumma fyrir það sem liðið er af tímabilinu og óskum honum að sjálfsögðu alls hins besta," segir á síðu Grindvíkinga.

Jón Axel og Ingvi Þór Guðmundssynir eru báðir að spila yfir 18 mínútur í leik með liðinu og Jón Axel er með 15,5 stig, 7,3 fráköst og 6,6 stoðsendingar að meðaltali í leik.

Eric Julian Wise er annar bandaríski leikmaðurinn hjá Grindavík á þessu tímabili og nú er orðið ljóst að hann verður ekki sá síðasti.

„Lið frá S- Kóreu sýndi því mikinn áhuga á að fá Eric nokkurn Wise til sín en fyrir þá sem ekki vita þá er hann kaninn okkar. Þegar svona kemur upp er ákaflega lítið sem lið frá Íslandi geta gert þar sem þetta er gríðarlegt tækifæri fyrir hans feril og nokkurn veginn vonlaust að koma í veg fyrir að hann yfirgefi skútuna. Það er nokkuð ljóst að leikurinn í kvöld gegn Haukum verður hans síðasti fyrir okkar lið," segir á fésbókarsíðu Grindvíkinga.

Eric Julian Wise er með 25 stig og 10,8 fráköst að meðaltali í leik hjá Grindavík en liðið hefur þó aðeins unnið 1 af 4 leikjum sem hann hefur spilað.

Sæl öll.Smá fréttir fyrir okkur frá okkur. Sökum mikilla anna í vinnu hefur Guðmundur Bragason tilkynnt Stjórn Kkd...

Posted by Körfuknattleiksdeild Grindavíkur Grindavík on 3. desember 2015