Kerr sendi Walton pillu eftir tapleikinn

Luke Walton hefur fyllt í skarðið sem þjálfari Golden State Warriors með stæl þar sem Steve Kerr er fjarverandi.

Kerr fór í tvær bakaðgerðir síðasta sumar og er enn að jafna sig. Aðstoðarmaður hans, Walton, hefur því stýrt liðinu það sem af er vetri og undir hans stjórn er liðið óstöðvandi.

Það vann fyrstu 24 leiki sína sem er besta byrjun liðs í sögu deildarinnar. Það kom mörgum á óvart samt að liðið skildi tapa fyrir Milwaukee Bucks af öllum liðum deildarinnar.

Kerr stóðst ekki mátið og ákvað að stríða Walton eftir tapið.

„Hvað í andskotanum ertu að gera? Þú hefur ekki hugmynd um hvað þú ert að gera... djók,“ skrifaði Kerr í textaskilaboðum til Walton eftir leikinn.