Eygló og Hrafnhildur í liði með margföldum meisturum

Einvígið í lauginni, eins konar Ryder-bikar sundsins, hefst í Indianapolis í Bandaríkjunum í kvöld en þar mætir Evrópu­úrvalið liði Bandaríkjanna. Eygló Ósk Gústafsdóttir, nýbakaður tvöfaldur bronsverðlaunahafi á EM í 25 metra laug, og Hrafnhildur Lúthersdóttir eru í Evrópuúrvalinu fyrstar Íslendinga.

Þetta er í sjöunda sinn sem Einvígið fer fram og í fjórða sinn sem Bandaríkin mæta Evrópu, en þar áður háðu Bandaríkin og Ástralía keppni í þrígang. Bandaríkin hafa unnið í hvert einasta sinn en í Glasgow fyrir ári þurfti umsund til að skera úr. Evrópsku stjörnunnar minntu þar hressilega á sig.

Alls verður keppt í 30 greinum; þrettán einstaklingsgreinum hjá hvoru kyni og tveimur boðsunds­greinum jafnt hjá körlum og konum. Sigurvegarinn í hverri grein fær fimm stig, annað sætið þrjú stig og þriðja sæti eitt stig. Keppt verður í 25 metra laug.

Eygló Ósk keppir í 200 metra baksundi og Hrafnhildur í 100 og 200 metra bringusundi. Eygló klárar í kvöld og Hrafnhildur syndir fyrra sundið sitt. Þær eru umkringdar stórstjörnum í sínu liði og þegar litið er á verðlaunafjölda liðsfélaga íslensku stúlknanna má bersýnilega sjá hversu mikill heiður það er fyrir þær að vera valdar í liðið. Þær hafa líka unnið fyrir sínu sæti með frábærum árangri á árinu en báðar komust fyrstar kvenna í úrslit á HM í 50 metra laug fyrr á árinu.

Eygló syndir mjög áhugavert sund í kvöld ásamt nýkrýndum Evrópumeistara, Katinku Hosszú, sem á heimsmetið í 25 metra laug, og heimsmeistaranum Missy Franklin frá Bandaríkjunum sem á heimsmetið í 50 metra laug. Þetta eru tvær af bestu, ef ekki hreinlega bestu sundkonur heims í dag. Hosszú, ungverska járnfrúin, vann sex gull á EM í Ísrael á dögunum.

Evrópuúrvalið treystir á danska dínamítið Jeanette Ottesen og hina hollensku Ranomi Kromowidjojo í sprettunum á móti firnasterku liði Bandaríkjanna sem mæta ­einnig með ótrúlega sterkt lið til leiks. Ottesen og Kromowidjojo eiga samtals 91 verðlaun frá HM og EM og ef við bætum Hosszú þarna inn eru verðlaunin orðin 134. Þetta eru bara þrjár sundkonur!

Ungverjarnir Dániel Gyurta og László Cseh eiga einnig að skila stigum fyrir evrópska liðið, en Cseh er heimsmeistari í 200 metra flugsundi. Rússinn Vladímír Morozov og Ítalinn Marco Orsi eiga svo að reyna að halda í við bandarísku eldflaugarnar á sprettinum.

Keppnin tekur tvo daga og lýkur þar með stórmótunum hjá Eygló Ósk og Hrafnhildi á þessu ári en það er varla hægt að klára árið á betri hátt.