Hjartans þakkir

Oprah Winfrey segir frá því í nýútkominni bók sinni þegar hún hringdi í Mayu Angelou, vinkonu sína og mentor, á ögurstundu og fékk viðbrögð sem hún átti alls ekki von á. Oprah lýsir þessum degi sem einum erfiðasta degi lífs síns. Hún hringdi í Mayu til að fá samúð en Maya benti henni á að vera þakklát! „Segðu takk og þakkaðu Guði fyrir þetta tækifæri sem hann hefur veitt þér til að upplifa, þjást og síðast en ekki síst læra,“ sagði hún. Opruh fannst henni kippt heldur hressilega út úr sjálfsvorkunninni en þennan dag lærði hún dýrmæta lexíu. Hún lærði um mátt þess að velja.

Ég er ekki það sem kom fyrir mig. Ég er það sem ég kýs að vera.

Orð Carls Jung bera með sér fyrirheitið um að aðstæður okkar þurfa ekki að skilgreina okkur.

Við getum valið að hefja okkur yfir erfiðleikana á vængjum þakklætisins.

Þegar við beinum sjónum okkar að þakklætinu öðlumst við nýja sýn á aðstæður okkar. Við sjáum að fátt er svo með öllu illt að ekki boði nokkuð gott. Þakklætið er einnig tilvalin leið til að bera kennsl á hlutina sem margir telja sjálfsagða, eins og líf, heilsu og daglegt brauð.

Janúaráskorun: Þakklæti í framkvæmd. Haltu þakklætisdagbók:

Skrifaðu niður fimm hluti sem þú ert þakklát/ur fyrir á hverjum degi.

Þakkaðu fyrir óorðna hluti:Kallaðu til þín það sem þig dreymir um með því að þakka fyrir það.

Dæmi: „Ég þakka fyrir nýja viðskiptavini sem ég fæ að þjóna með vinnu minni á árinu.“

Kærleikskveðjur,

Edda Jónsdóttir

markþjálfi