Ægir með 31 stoðsendingu í Njarðvíkurleikjunum í vetur

Ægir Þór Steinarsson og félagar í KR unnu Njarðvíkinga í þriðja sinn í Ljónagryfjunni í gær og líkt og áður var þessi eldfljóti bakvörður duglegur að spila uppi liðsfélaga sína.

Ægir Þór var með 12 stig og 14 stoðsendingar í Njarðvík í gær og hitti úr 6 af 8 skotum sínum í leiknum.

Ægir hefur alls gefið 31 stoðsendingu í leikjunum þremur á móti Njarðvík en það eru tveir deildarleikir og einn bikarleikur. KR hefur unnið þessa leiki með 18,7 stigum að meðaltali.

Ægir hefur einnig skorað 28 stig og tekið 21 fráköst í leikjunum þremur. Það vekur athygli að Ægir er með 62 prósent skotnýtingu en náði þó ekki að skora þriggja stiga körfu í leikjunum.

Ægir er líka með tíu fleiri stoðsendingar (31) en skot (21) í þessum þremur sannfærandi sigrum KR-liðsins á Njarðvíkingum.

Framlag Ægis í varnarleik KR-liðsins er hér óupptalið en hann hélt Oddi Rúnari Kristjánssyni, leikstjórnanda Njarðvíkinga, í 3 stigum í leiknum í gær. Oddur var með fleiri tapaða bolta (4) en stig og nýtti aðeins 1 af 5 skotum sínum.

Leikir Ægis á móti Njarðvík í vetur

29 stiga sigur í deildinni í október, 105-76

7 stig, 10 fráköst, 9 stoðsendingar (hitti úr 3 af 7 skotum)

16 stiga sigur í bikarnum í janúar, 90-74

9 stig, 5 fráköst, 8 stoðsendingar (hitti úr 4 af 6 skotum)

11 stiga sigur í deildinni í janúar, 100-89

12 stig, 6 fráköst, 14 stoðsendingar (hitti úr 6 af 8 skotum)

Samanlagt í leikjunum þremur á móti KR:

28 stig (9,3 í leik)

21 fráköst (7,0 í leik)

31 stoðsending (10,3 í leik)

Hitti úr 13 af 21 skoti (62 prósent nýting)