Kobe frábær í öðrum sigri Lakers í röð

Kobe Bryant var aðalmaðurinn í þriggja stiga sigri Los Angeles Lakers á New Orleans Pelicans á útivelli í NBA-deildinni í körfubolta í nótt, 99-96.

Kobe skoraði þriggja stiga körfu sem innsiglaði sigurinn þegar mínúta var eftir og veifaði öðrum fingrinum framan í áhorfendur í New Orleans sem gátu lítið sagt eða gert.

Kobe skoraði í heildina 27 stig og tók 12 fráköst, en hann hitti úr þremur mikilvægum þriggja stiga skotum á síðustu sex mínútunum sem trygði sínum mönnum sigur.

„Það er alltaf sérstakt að spila hérna. Mér líður rosalega vel fyrir framan þetta fólk. Mér líður eins og þetta fólk kunni að meta það sem ég hef gert á mínum ferli,“ sagði Kobe, en stuðningsmenn New Orleans klöppuðu meira að segja fyrir skotum hans undir lok leiksins.

Lakers er nú búið að vinna tvo leiki í röð í NBA-deildinni en er eftir sem áður á botni vesturdeildarinar með aðeins ellefu sigra og 41 tapleik.

Úrslit næturinnar:

Detroit Pistons - NY Knicks 111-105

Phoenix Suns - Houston Rockets 105-111

New Orleans Pelicans - LA Lakers 96-99

Portland Trail Blazers - Toronto Raptors 103-110

Staðan í deildinni.