Tengist teiknuðu persónunum

Ingibjörg Berglind Guðmundsdóttir teiknar öllum stundum. Hún skapar tilfinningaheim í kringum persónurnar sem hún teiknar og á stundum erfitt með að skilja þær við sig.

„Ég er mjög sjaldan búin að ákveða hvað úr verður þegar ég byrja á teikningu. Ég byrja á að teikna augun og út frá þeim kemur tilfinningin um nýjan karakter. Yfirleitt teikna ég per­sónur og í huganum skapa ég tilfinningaheim í kringum þær sem enginn fær að heyra af. Ég á það til að bindast persónunum og oft finnst mér erfitt að skilja við þær,“ segir Ingibjörg Berglind Guðmundsdóttir sposk þegar hún er spurð út í teikningarnar sínar.

Ingibjörg er grafískur hönnuður en teiknar í frístundum undir heitinu IBegga. Innblásturinn segist hún frá úr ýmsum áttum.

„Ég fæ innblásturinn mikið frá tónlist en ef ég á að nefna einhverjar fyrirmyndir væru það helst Egon Schiele, Miro og Modigliani. Teikningarnar eru áhugamál mitt sem ég sinni eftir vinnu. Ég byrjaði reyndar að teikna mikið eftir að ég útskrifaðist sem grafískur hönnuður og velti því jafnvel fyrir mér hvort ég hefði átt að fara í fagurlistir frekar en hönnun. En oft næ ég að blanda þessu tvennu saman,“ segir Ingibjörg en hún lauk námi í grafískri hönnun frá Myndlistaskólanum á Akureyri fyrir tveimur árum.

Ingibjörg vinnur teikningarnar mestmegnis með blýanti og penna.

„Stundum geng ég í gegnum tímabil og nota kannski aðallega blek í myndirnar. Nú er ég til dæmis að mála mikið með gylltu ofan í blekið,“ segir Ingibjörg.

Nánar má forvitnast um verk hennar á Ibegga á Instagram og Facebook.