Sögðu einn árásarmanninn hafa verið handtekinn

Lögreglan í Belgíu var í morgun sögð hafa handtekið mann sem grunaður er um aðild að hryðjuverkaárásunum í Brussel í gær. Það var haft eftir fjölmiðlum í Belgíu sem nú hafa dregið fréttir sínar til baka. Hann var sagður hafa verið handtekinn í Anderlecht, en í svo virðist sem að annar maður hafi verið handtekinn.

Najim Laachraoui er talinn vera sprengjugerðarmaður hópsins og náðist á mynd á Zaventem flugvellinum ásamt tveimur bræðrum sem sprengdu sig í loft upp. Laachraoui er sagður hafa flúið frá flugvellinum eftir að sprengjuvesti hans sprakk ekki.

Vestið fannst á flugvellinum í gær og var sprengt af sprengjusveitum lögreglunnar. Laachraoui er einnig talinn hafa búið til sprengjurnar sem notaðar voru til árásanna í París í nóvember. Erfðaefni hans fannst á sprengjuvestum í Bataclan.

Ríkissaksóknari Belgíu mun halda blaðamannafund á eftir og talið er að hann muni koma að handtökunni í máli sínu.