Guðmundur baðst afsökunar á ummælum sínum

Guðmundur Steinarsson, þjálfari knattspyrnliðs Njarðvíkur, hefur beðist afsökunar á Twitter-færslu sem hann birti í gærkvöldi.

Eins og fram hefur komið á Vísi í dag vakti umrædd færsla mikið umtal en tilefnið var meiðsli Stefan Bonneau, leikmanns körfuknattleiksliðs Njarðvíkur.

Bið stjórn,stuðningsmenn, leikmenn,þjálfara UMFN og ekki síst Stefan afsökunar á tísti mínu í gærkvöldi. Óska ég um leið Stefan góðs bata.

— Gummi Steinars (@gummisteinars) March 22, 2016

„Verður fróðlegt að sjá hvað ákveðin tegund af kærleik gerir núna? #flokkstjóri #sumaríReykjanesbæ,“ skrifaði Guðmundur á Twitter-síðu sína en hefur nú beðist afsökunar.

Sjá einnig: Þjálfari Njarðvíkinga segir veru Bonneau hér á landi vera mikið leikrit

Hann vildi ekki tjá sig um málið þegar Vísir ræddi við hann í dag og þá var greint frá því á vef Víkurfrétta að stjórn knattspyrnudeildar Njarðvíkur myndi funda vegna málsins í dag.

Flestir knattspyrnuáhugamenn þekkja til Guðmundar sem var frábær knattspyrnumaður á sínum tíma. Hann er bæði leikja- og markahæsti leikmaður í sögu Keflavíkur.