Leitar að fullkomnum stað fyrir Miss Universe Iceland

Okkur langar að reyna að breyta ímyndinni, frá kroppasýningu yfir í eitthvað sem virkar valdeflandi fyrir konur,“ segir samfélagsmiðladrottningin Manuela Ósk Harðardóttir, ungfrú Ísland 2003, sem nú haslar sér völl innan raða Miss Universe Organization. Hún stendur nú í ströngu við að setja á fót afsprengi keppninnar Miss Universe, Miss Universe Iceland, hér á landi og fer sú keppni fram í haust.

„Við Jorge Esteban, samstarfsmaður minn, höfum verið að þreifa fyrir okkur hérna og skoða mögulega staði til að hýsa keppnina og keppendur,“ útskýrir Manuela sem er að vonum yfir sig spennt fyrir nýja starfinu.

„Þessi keppni er þannig að hún ber höfuð og herðar yfir aðrar keppnir. Ég held að Íslendingar geri sér ekki alveg grein fyrir stærðar­gráðu þessarar keppni. Engin keppni fær meira áhorf en þessi á heimsvísu. Hún var í eigu Donalds Trump, en IMG módelskrifstofan keypti hana í fyrra, en það er einhver sú stærsta sinnar tegundar í heiminum. Sú stofa tekur svo við stelpunni sem sigrar svo stökkpallurinn getur verið ansi hár,“ útskýrir Manuela og bendir á að þarna séu ótal tækifæri fyrir stúlkur sem langar að hasla sér völl í þessum bransa.

„Þær sem vilja fara þessa leið geta þarna fengið til þess tækifæri. Við munum kappkosta að vanda til verks og passa upp á að þetta verði aldrei „cheap“ eða ósmekklegt. Þessi keppni sem við erum að undirbúa verður í anda þeirrar sem haldin er úti. Í dómnefndinni munu til dæmis aðeins sitja erlendir dómarar ólíkt því sem tíðkast hefur hér heima í fegurðarsamkeppnum til þessa. Sem er gott, þá getur fólk ekkert verið að tengja þennan eða hinn við keppendur vegna smæðarinnar,“ bendir hún á.

„Mig skiptir miklu máli að varpa ljósi á að þessi keppni snýst um svo mikið meira en vera sæt í bikiníi. Hún þarf að vera virkilega klár, manneskjan þarf að standa á sviði fyrir framan milljónir manna og svara óundirbúnum spurningum svo dæmi sé tekið. Þetta getur verið mjög góður stökkpallur fyrir greindar stelpur sem vilja komast lengra,“ segir Manuela og blæs þar með á ákveðna stimplun sem loðir gjarnan við keppendur í fegurðarsamkeppnum.

Spurð hvort virkilega sé markaður fyrir slíka keppni á Íslandi árið 2016, hvað þá tvær, segir hún svo vera. „Auðvitað er alltaf hópur sem ekki fílar svona keppni og finnst þetta glatað. Það er allt í lagi. Hér er líka hópur sem fílar þær og er „open minded“ í þessu samhengi, og sér þannig tækifærin sem felst í þátttökunni.“

Sjálf segist Manuela ætla að nýta sína eigin reynslu af þátttöku í fegurðarsamkeppnum til að gera keppnina uppbyggjandi fyrir stelpurnar. Til stóð að Manuela myndi einmitt taka þátt í Miss Universe í kjölfar sigursins í Ungfrú Ísland 2003 en varð frá að hverfa vegna veikinda á lokametrunum.

„Mín upplifun á Ungfrú Íslandi á sínum tíma einkennist af bæði kostum og göllum. Sjálf hefði ég viljað taka þátt aðeins eldri, þetta mun allt saman nýtast mér við að breyta ímyndinni.“ 



Manuela hefur þegar fengið kórónuna í hendurnar en hyggst ekki sýna hana almenningi fyrr en í maí, er keppnin verður kynnt frekar fyrir landanum. „Þetta er bara að fara af stað núna, heimasíðan fer fljótlega í loftið þar sem áhugasamir geta leitað frekari upplýsinga eða skráð sig. Þangað til er fésbókarsíðan okkar ágæt,“ segir hún brosandi að lokum.