Haukaleikirnir kalla á stórar breytingar hjá Stólunum

Tindastólsmenn hafa enn á ný þurft að gera stóra breytingu á liði sínu í körfunni en Bandaríkjamaðurinn Anthony Isaiah Gurley hefur yfirgefið liðið í miðri úrslitakeppni.

Þetta er þriðja stóra breytingin hjá Stólunum á tímabilinu en þeir létu finnska þjálfarann Pieti Poikola fara í október, ráku bandaríska leikmanninn Jerome Hill í byrjun febrúar og eru nú að missa annan af tveimur Bandaríkjamönnum liðsins í miðju undanúrslitaeinvígi.

Allar eiga þessar breytingar eitt sameiginlegt því kveðjuleikir þeirra Pieti Poikola, Jerome Hill og Anthony Isaiah Gurley voru allir á móti Haukum.

Pieti Poikola var rekinn eftir átta stiga tap á móti Haukum á heimavelli 29. október en Stólarnir lentu þá 16-0 undir í byrjun leik og voru 37-11 undir um miðjan annan leikhluta.

Síðasti leikur Jerome Hill með Stólunum var í 79-76 tapi á Ásvöllum 29. janúar þar sem hann var með 21 stig, 10 fiskaðar villur og 5 fráköst. Stólarnir voru 40-34 yfir í hálfleik en töpuðu þriðja leikhlutanum 28-18.

Lokaleikur Anthony Isaiah Gurley var í 69-68 sigri Stólanna á Haukum á Sauðárkróki á miðvikudagskvöldið. Hann byrjaði inná og lék fyrstu 4 mínútur og 44 sekúndur leiksins. Gurley klikkaði á þremur fyrstu skotunum sínum og settist á bekkinn þegar staðan var 10-2 fyrir Hauka. Anthony Gurley kom ekki meira við sögu í leiknum.

Haukarnir unnu báða deildarleiki liðanna og fyrsta leikinn í undanúrslitaeinvíginu. Þeir voru síðan mjög nálægt því að komast í 2-0 á Króknum en Pétur Rúnar Birgisson tryggði heimamönnum sigri með frábærri einstaklingskörfu.

Það er því mikil spenna í einvíginu og næsti leikur er á Ásvöllum klukkan 17.00 á laugardaginn. Þar verða Stólarnir bara að treysta á Bandaríkjamanninn Myron Dempsey.