Táraðist við að semja lögin því ljóðin eru svo sorgleg

„Ég hef lengi samið tónlist og oft sungið djass, bæði með böndum og í eigin nafni en þetta er miklu stærra og verður að hugsjónaverkefni af því að áhugaverð saga er á bak við.“ Þetta segir María Magnúsdóttir, söngkona og tónskáld, um ókeypis menningarviðburð í Listasafni Íslands á morgun, sunnudag,  milli klukkan 14 og 15.

Þar mun Kvennakórinn Katla syngja þrjú ný lög eftir Maríu við ljóð Guðnýjar Jónsdóttur frá Klömbrum (1804-1836) sem átti erfiða ævi og var ein þeirra kvenna sem ekki fengu notið sín sem skáld í lifanda lífi.

Helga Kress bókmenntafræðingur og María Ellingsen leikkona sem hafa kynnt sér líf og ljóð Guðnýjar koma þar líka fram.

María hafði nýlokið prófi í djassi frá Konunglega listaháskólanum í Haag í Hollandi í fyrravor þegar hún sá grein um þöggun skáldkvenna eftir Magneu J. Matthíasdóttur. Hún snart hana svo að hún leitaði uppi allt sem hún fann um Guðnýju.

„Mig langaði að semja fyrir kvennakór og hafði heyrt af  Kötlu sem er skipaður ungum konum.

Fyrst var ég að hugsa um nýstárlegar útsetningar en svo urðu lögin næstum sálmaleg því það hentar ljóðunum. Ég táraðist við að semja lögin því ljóðin eru svo sorgleg og veit að efnið tekur á stelpurnar í kórnum.“



Greinin birtist fyrst í Fréttablaðinu 2. apríl.