Innblásturinn VHS myndkassettur

Næstkomandi laugardag opnar PORT verkefnarými sýningu á verkum Atla Bollasonar og Sigtryggs Bergs Sigmarssonar - SNOW MOTION. Meginþema sýningarinnar eru verk innblásin af VHS myndkassettum og myndtruflunum úr sama miðli. Sýningin opnar klukkan sex.

Myndsuð eða myndtruflanir er kallað „snjór“ á fjöldamörgum tungumálum. Þegar snjókornin eru grandskoðuð kemur í ljós að þau eru einstök og formfögur, síbreytileg og litrík.

Á SNOW MOTION mætast tveir listamenn sem báðir hafa unnið fjölbreytt verk síðustu ár. Það sem sameinar þá á þessari sýningu nú er myndbandskassettan, sem var allt um lykjandi fyrir nokkrum árum. Vídeóspólan er til margs nothæf enn þann dag í dag. Það má byggja á henni, hlaða henni upp eins og múrsteinum, og ef vel er leitað má finna nýjar myndir í henni, allt aðrar myndir en þær sem lagt var upp með að spólan sýndi í myndbandakerfum fjölbýlishúsa okkar jarðarbúa.

Listamennirnir eru:

ATLI BOLLASON (f. 1985) hefur fengist við fjöldamargar listgreinar undanfarin ár. Hann hefur sýnt innsetningar og vídeóverk, síðast í samstarfi við Or Type á Hönnunarmars; hann hefur umbreytt ljósahjúpi Hörpu í gagnvirk listaverk, bæði tölvuleikinn PONG og sérstakt ljósaorgel; hann gaf út tvær plötur og lék á tugum tónleika með hljómsveit sinni Sprengjuhöllinni; hann hefur leikið í stuttmyndum, gamanþáttum og nú síðast kanadísku kvikmyndinni O, Brazen Age; hann hefur þýtt draugasögur og birt smásögur og ljóð auk þess sem hann hefur fengist við textagerð fyrir Gusgus, Hjaltalín, Högna Egilsson og Helga Björnsson. Þess utan hefur Atli starfað við auglýsingagerð, sem menningarblaðamaður og gagnrýnandi, plötusnúður, og innsti koppur í búri hjá kvikmyndahátíðinni RIFF. Atli lauk meistaragráðu í enskum bókmenntum frá Concordia háskóla í Montréal árið 2011 og BA prófi í almennri bókmenntafræði frá Háskóla Íslands árið 2007.

SIGTRYGGUR BERG SIGMARSSON (f. 1977) stundaði myndlistarnám í Hannover hjá prófessor Ulrich Eller og lauk meistaragráðu frá Fachhochschule Hannover Bildende Kunst árið 2003. Áður hafði hann stundað nám við Konunglega konservatoríið í Haag á árunum 1997 - 1998.

Valdar einkasýningar - Galerie Tatjana Pieters, Ghent (BE), Lindenau,

Leipzig (DE), Castle Insterburg, Tchernyakhovsk (RU), Gallerí Ágúst,

Reykjavík (IS), Museums Quartier (AUS), Kunstschlager, Reykjavik (IS),

Der Grieche, Berlin (DE), National Gallery of Iceland, Reykjavik (IS),

Rocksbox Fine Art, Portland (USA), Hectoliter, Brussels (BE),

Stadslimiet, Antwerpen (BE), Basement Gallery, Vienna (AT) &

Trampoline Gallery, Antwerpen (BE)

Valdar samsýningar -  Listasafn Íslands, Reykjavík (IS), Hafnarborg,

Hafnarfjörður (IS), Listasafn Reykjavíkur, Reykjavík (IS), M HKA,

Antwerpen (BE), Copenhagen Art Festival, Copenhagen (DK), 21er

Kunsthaus, Vienna (AT), The Living Art Museum, Reykjavik (IS),Galerie

21, Hamburg (DE), De Vleeshal, Middelburg (NL) & Galerie Tatjana

Pieters, Ghent (BE).