Við veitum fólki hugarró

Securitas hefur í nærri fjóra áratugi varið heimili, fyrirtæki og sumarbústaði fólks fyrir þjófnaði og skemmdum vegna vatns og elds. Securitas rekur öflugt öryggisgæslusvið ásamt tæknisviði sem fylgist með öllum tækninýjungum enda hefur þróunin, til að mynda í myndeftirliti, verið ótrúleg. Heiðarleiki, árvekni og hjálpsemi eru einkunnarorð Securitas og eru þau í hávegum höfð.

Securitas var stofnað á Ísland árið 1979 og hefur átt langan og farsælan feril. „Securitas var stofnað í kringum eitt lítið verkefni og nú, nærri fjörutíu árum síðar, erum við enn leiðandi í öryggisgæslu og þjónustu,“ segir Hjörtur Freyr Vigfússon, markaðsstjóri Securitas, glaðlega. Hann segir fyrirtækið í sífelldri þróun eftir því hvað markaðurinn kalli á hverju sinni. „Við höfum fengist við ýmislegt í gegnum tíðina,“ segir Hjörtur en Securitas á einnig nokkur dótturfélög sem tengjast öryggismálum beint og óbeint. Til dæmis er boðið upp á lúxusakstur, geymsluleigu og þjónustu tengda ökutækjaritum og flotastýringum. „Við höfum sinnt fjölbreyttum hlutverkum í gegnum tíðina sem öll tengjast því að veita fólki öryggi og hugarró.“

Ekki aðeins þjófavörn

Margir tengja Securitas við mannaða öryggisgæslu og innbrotakerfi en Hjörtur leggur áherslu á að það sé aðeins hluti af því sem fyrirtækið standi fyrir. „Öryggiskerfin okkar veita ekki síður vörn gegn tjóni af völdum vatns og elds. Við fáum til dæmis mýmörg útköll í hverri viku vegna vatnstjóns,“ segir hann og bendir á að þó öryggiskerfin komi ekki í veg fyrir leka eða bruna þá geti þau hindrað að tjónið verði meira en það þarf að vera og í raun komið í veg fyrir stórtjón. 

Securitas veitir um tuttugu þúsund aðilum vörn af einhverju tagi, þar af eru tólf þúsund heimili eða um 10 prósent af öllum fasteignum á landinu. „Við erum með öryggiskerfi í öllum tegundum húsnæðis, frá fjölbýli til einbýlis,“ segir Hjörtur. Hann telur að fólk sé að verða mun meðvitaðra um kosti öryggiskerfanna, sér í lagi fjölskyldufólk sem er stór hluti af viðskiptavinum Securitas. „Flestir finna hjá sér þörf til að skoða öryggismál sín þegar fyrsta barnið fæðist.“

Einnig er mikill vaxtarbroddur á fyrirtækjamarkaði að sögn Hjartar. „Þar bjóðum við upp á fjölbreyttar vörur og þjónustu, sérstakar brunavarnir, myndeftirlit og aðgangsstýringar svo aðeins fátt eitt sé nefnt,“ upplýsir hann.

Öflug tækniþekking

Í kringum 450 manns starfa hjá Securitas. Um 45 prósent starfa sem öryggisverðir sem þýðir að meirihluti starfsmanna sinnir störfum í stoð- og tæknideildum. „Tæknideildin er ein stærsta deildin okkar enda má segja að við séum farin að tejast til hátæknifyrirtækis,“ segir Hjörtur. Hann bendir á að ótrúleg tækniþróun eigi sér stað í þessum bransa, sér í lagi öllu sem tengist myndeftirliti. „Manni finnst þróunin ævintýri líkust. Það sem maður sá í bíómyndum fyrir fimm árum og þótti ótrúverðugt er orðið að veruleika í dag,“ lýsir hann. Til dæmis megi þekkja andlit fólks í fjölda með ótrúlegri nákvæmni, hægt sé að greina milli kynja og greina hæð fólks.

Þjónusta um allt land

Securitas veitir þjónustu víðs vegar um Ísland. Meginstarfsstöðin er í Reykjavík, en einnig eru starfsstöðvar á Reykjanesi, Akureyri, Austurlandi, Selfossi og í Borgarnesi. „Securitas býður sams konar þjónustu um allt landið og sama vöruframboð,“ segir Hjörtur. 

Securitas starfrækir stjórnstöð í Reykjavík og á Akureyri. „Starfsfólk okkar á stjórnstöðvunum sinnir þörfum viðskiptavina fyrirtækisins allan sólarhringinn, alla daga vikunnar, allan ársins hring,“ lýsir Hjörtur en sími stjórnstöðvar er 533-5533.

Leiðandi frá upphafi

Securitas er löngu orðið þjóðþekkt fyrir starfsemi sína enda hefur fyrirtækið verið leiðandi á öryggismarkaðnum frá upphafi. „Við leggjum metnað okkar í að vera leiðandi og gerum það með því að veita framúrskarandi þjónustu og höfum við að leiðarljósi að stytta okkur aldrei leið í veitingu þjónustunnar. Við hlustum á viðskiptavini okkar og erum sífellt að breyta vinnulagi og þjónustuframboði okkar eftir kröfum þeirra.“