Forsetinn sagður nota sterka frambjóðendur til að þurfa ekki að hætta við vegna aflandsskjalamála

„Ég met það þannig að það séu góðar líkur á að hann hætti,“ segir almannatengillinn Andrés Jónsson um Ólaf Ragnar Grímsson, forseta Íslands, sem gat ekki svarað því hvort nafn hans verði á kjörseðli þegar gengið verður til forsetakosningum í sumar.

Ólafur Ragnar var í viðtali í Eyjunni á Stöð 2 fyrr í dag þar sem hann sagðist vera að endurmeta stöðuna í ljósi nýrra framboða sem hafa bæst við forsetaslaginn og benti þar á sagnfræðinginn Guðna Th. Jóhannesson og Davíð Oddsson, ritstjóra Morgunblaðsins og fyrrverandi forsætisráðherra.

Sjá einnig: Ólafur Ragnar tvístígandi um framboð: Fór fögrum orðum um Davíð Oddsson

„Þá hefði það orðið eftirmælin hans“

„Ég held að hann bakki. Hann gæti beðið eftir fyrstu könnun en það gæti tafist út af Davíð. Menn voru örugglega byrjaðir á könnun sem þarf að byrja aftur á út af Davíð,“ segir Andrés en Davíð tilkynnti um framboð sitt í þættinum Sprengisandi á Bylgjunni í morgun. Andrés segir Ólaf Ragnar vera örugglega kominn langt með að hætta og hafi verið að leita að annarri ástæðu til að draga framboð sitt til baka en fregnir af aflandseignatengslum eiginkonu sinnar, Dorrit Moussaieff. 

„Hann gat bara ekki hætt í tengslum við þessi aflandsskjalamál því þá hefði það orðið eftirmælin hans. Hann er búinn að vera svo lengi og maður sér að hann tiltekur að það sé komnir sterkir frambjóðendur þó honum sé ekkert sérstaklega vel við hvorugan. Þannig að ég held að hann sé að leita að annarri ástæðu og sé örugglega kominn langt með að hætta við,“ segir Andrés.

Framboð Davíðs lengi í bræðingi

Það vakti töluverða athygli hve fögrum orðum þeir Davíð og Ólafur fóru um hvorn annan í viðtölum í dag en Andrés segir það ekki benda til þess að þeir séu búnir að gera samkomulag sín á milli að Davíð taki við kyndlinum af forsetanum í ljósi veikrar stöðu Ólafs Ragnars.

„Ég held ekki. Af því ólíkt því sem Davíð sagði í viðtalinu þá er þetta búið að vera í bræðingi lengi að gefa kost á sér. Hans nánustu samstarfsmenn og stuðningsmenn hafa verið að kanna áhuga á hans framboði og biðja fólk um að styðja hann og meðal annars Kjartan Gunnarsson. Ólafur Ragnar hefði ekki gefið kost á sér ef þeir væru búnir að tala sig saman um þetta. Ég veit ekki til þess að þeir séu í neinu sambandi þó það fari einhverjum sögum af því. Ég held hins vegar að þetta séu allt taktískt ummæli hjá þeim báðum. Eins og heyrist tjá þeir sig með mjög svipuðum hætti. Ef þeir eru agressífir þá eru þeir passíft agressífir.  Þeir báðir segja hluti sem eru eiginlega oft hálfgerð öfugmæli en segja það á þann hátt að þeir sleppa með það. Þeir eru mjög reyndir, með svipaðan stíl og klárir og skyldi enginn vanmeta þá,“ segir Andrés. 

Telur Guðna Th. hafa svarað vel fyrir harða gagnrýni

Hann segir mikinn meðbyr með Guðna Th. Jóhannessyni. Guðni hefur farið mikinn í viðtölum eftir að hann tilkynnti formlega um framboð sitt á uppstigningardag og hefur svarað nokkuð afdráttarlaust gagnrýni sem hann hefur fengið á sig. Andrés segir Guðna hafa leyst vel úr því.

Sjá einnig: Guðni Th. um meintar árásir gegn öðrum frambjóðendum: „Ég er þá í öðru sæti á eftir meistaranum“ 

„Þessi lína hjá honum, sem minnir mig á eitthvað sem maður hefur séð úr bandarískum stjórnmálum, þar sem hann segir: „Ég hef lofað að ég mun svara öllum spurningum sem til mín er beint“, þetta er svo sterk ímyndarsköpun þegar hann kemur með þessa línu. Svo svarar hann alltaf spurningunum. Svo hljóp hann viljandi til hægri fyrstu dagana eftir formlegum tilkynninguna. Það var í rauninni af því hann var búinn að sjá hvar hann yrði gagnrýndur og menn myndu reyna að skilgreina hann sem ESB-sinna. Þá fór hann mjög langt frá því og svo var hann búinn að hugsa vel svarið sitt varðandi Icesave.“ 

Gæti skapað pláss fyrir Andra Snæ

Hann segir þessar vendingar mögulega geta skapað pláss fyrir Andra Snæ Magnason sem mældist með talsvert fylgi en dalaði töluvert þegar Guðni Th. bættist inn í myndina.  „Það gæti myndast einhver bylgja þegar einmitt Guðni er að reyna að höfða svo vítt og breytt. Hann gæti skapað pláss fyrir Andra en varla nóg til að Andri nái að sigra. En maður skyldi aldrei segja aldrei. Andri er búinn að vera í svolitlum mótbyr og hefur ekki náð flugi en hann mun væntanlega bíða þar til kemur að sjónvarpskappræðum áður en hann ákveður sig hvort hann fer alla leið.“