Leitin að hinum fullkomna nuddstól

Goodbye átti upphaflega að vera „power“-ballaða, okkur fannst það svo tilvalið þar sem Adele var nýbúin að gefa út hinn dramatíska hittara Hello, að koma með einhvers konar andsvar við því. Svo þróaðist þetta reyndar út í „mellow“-dramatískt stuðlag sem allir ættu að geta dansað við, hvort sem það er úti á dansgólfinu eða í hægindastólnum,“ segir Melkorka Sigríður Magnúsdóttir söngkona Milkywhale um nýjasta lag sveitarinnar. Hún, ásamt Árna Rúnari Hlöðverssyni, skipar Milky­whale. Árni er einnig meðlimur í hljómsveitinni FM Belfast.

„Við vinnum öll lögin okkar heima í stofunni hjá Árna og Lóu, ég hef alltaf sagt að Milkywhale sé kaffivélinni þeirra að þakka.“

„Þegar Magnús Leifsson leikstjóri kom með hugmyndina að myndbandinu þá þurfti ekki langan tíma til að sannfæra okkur. Í stuttu máli fjallar það um mann og leit hans að hinum fullkomna nuddstól. Magga langaði að búa til myndband þar sem hápunkturinn í viðlaginu væri frekar óhefðbundinn hápunktur. Sjón er sögu ríkari í þeim efnum. Hannes Óli Ágústsson leikari fer með aðalhlutverkið, hann er frábær performer og í algjöru uppáhaldi hjá okkur sem leikari. Við vorum líka saman í dansverki fyrir nokkrum árum og ég vissi að hann væri rétti maðurinn í hlutverkið.“ 

Milkywhale hefur verið tilnefnd til Nordic Music Video verðlaunanna fyrir myndbandið Birds of Paradise, sem Magnús Leifsson leikstýrði einnig. Myndbandið fær tilnefningar í þremur flokkum: tónlistarmyndband ársins, besti flutningur listamanns og besta listræna stjórnun. Auk þess fær annað myndband sem Magnús leikstýrði tilnefningu en það er myndbandið við lag Ólafs Arnalds og Alice Sara Ott, Reminiscence, en það fær tilnefningu fyrir bestu frammistöðu leikara.

Sjá einnig: Magnús Leifs með fjórar tilnefningar til Nordic Music Video Awards

„Milkywhale er náttúrulega alveg óþekkt hljómsveit svo það er ótrúlegt að fá þrjár tilnefningar. Við erum í flokkum með ekki ómerkilegri listamönnum en David Bowie, MØ og Major Lazer. Svo er Maggi Leifs eini leikstjórinn sem hefur verið tilnefndur öll þrjú árin og við tökum þátt í pallborðsumræðum á hátíðinni núna á laugardaginn þar sem við ætlum að ræða samstarfið.“

Magnús Leifsson hefur áður verið tilnefndur, fyrir myndbandið við Old Skin með Ólafi Arnalds, Bright­er Days með FM Belfast og Candle­stick með múm.

„Í augnablikinu er Árni í fríi í skattaskjóli á Bresku Jómfrúaeyjunum. Svo ætla ég líka í smá frí, öllu heldur snakkpokaferð, til Kanarí­eyja. Þegar það er búið byrjar Milky­whale aftur af krafti. Við spilum á Húrra 3. júní og verðum svo á Hróarskeldu í lok júní. Þá erum við á fullu að klára fyrstu plötuna okkar sem kemur út í september og verður fylgt eftir með tónleikaferðalagi. Milkywhale byrjaði upphaflega sem dansverkefni og hlaut Menningarverðlaun DV í flokki danslistar í byrjun árs. Við ætlum að fylgja því eftir og vorum valin til þess að taka þátt á stóru norrænu dansfestivali í Kaupmannahöfn í haust. Svo það eru spennandi tímar fram undan,“ segir Melkorka um hvað sé á döfinni hjá Milkywhale.