Sjáðu Gumma Ben gjörsamlega missa það í lok Englandsleiksins
Sunna Kristín Hilmarsdóttir skrifar
Gummi Ben sendi Englendingum skýr skilaboð eftir leikinn í gær.vísir
Guðmundur Benediktsson, betur þekktur sem Gummi Ben, missti sig algjörlega, eins og væntanlega meirihluti íslensku þjóðarinnar, þegar slóvenski dómarinn í leik Íslendinga og Englendinga flautaði til leiksloka í gærkvöldi. Sigur strákanna okkar tryggði þeim sæti í 8-liða úrslitum Evrópumótsins og sendi enska landsliðið heim með skottið á milli lappanna.
Gummi Ben lýsti leiknum í Sjónvarpi Símans í gær og hefur Síminn nú birt myndband á Facebook-síðu sinni sem sýnir Gumma á síðustu andartökum leiksins í gær. Þessi ótrúlegi lýsandi fangaði stemninguna vel, nú sem endranær, en Gummi hefur vakið heimsathygli fyrir lýsingar sínar á leikjum íslenska landsliðsins. Klippuna sem Síminn deildi má sjá hér að neðan.
Margir hafa velt fyrir sér uppruna söngs íslensku stuðningsmannanna á EM sem hefur meðal annars verið kallaður stríðsöskur í erlendum fjölmiðlum en upphafið hér á landi má rekja til Silfurskeiðarinnar, stuðningsmannasveitar Stjörnunnar.
Mikill mannfjöldi var saman kominn í Bankastrætinu um miðnæturbil þar sem sunginn var stríðssöngurinn sem hefur verið einkennandi fyrir íslensku stuðningsmennina í tengslum við EM.
