Hlutabréfahrun í breskum bönkum

Viðskipti voru stöðvuð með hlutabréf í bresku bönkunum Barclays og Royal Bank of Scotland á hlutabréfamarkaðnum í London eftir gríðarlegar lækkanir.

Gengi bréfa Barclays hafði lækkað um 10,3 prósent og bréfa RBS um 15 prósent sem leiddi til stöðvunar viðskipta þar sem um var að ræða meira en átta prósent lækkun. Viðskipti stöðvuðust í fimm mínútur en hófust svo á ný.

Hlutabréfin hafa lækkað um rúmlega 13 prósent í dag hjá Barclays klukkan 10.40 á íslenskum tíma og hjá RBS um tæplega 16 prósent i dag.

Hlutabréf í öðrum breskum bönkum hafa hrunið í morgun. Gengi bréfa Lloyds hafa lækkað um tæplega níu prósent það sem af er degi.