Lagerbäck: Starfsfólk KSÍ er ofhlaðið vinnu

Lars Lagerbäck, fráfarandi landsliðsþjálfari Íslands, segir nauðsynlegt fyrir lykilfólk í íslenskri knattspyrnu að setjast niður og ræða hvernig móta eigi íþróttina til framtíðar, ekki síst í ljósi þess fjármagns sem nú streymir inn í KSÍ eftir velgengni Íslands á EM í Frakklandi.

Þetta sagði hann í samtali við Fréttablaðið á laugardag en Lagerbäck hætti störfum hjá KSÍ þegar Ísland féll úr leik á Evrópumótinu í Frakklandi í upphafi mánaðarins. Þá hafði hann starfað sem landsliðsþjálfari í fjögur og hálft ár.

Sjá einnig: Lars Lagerbäck: Alvöru prófraun fyrir íslenska knattspyrnu

Lagerbäck segir enn fremur í samtali við Vísi að forráðamenn og starfsfólk KSÍ þurfi einnig að nýta þetta tækifæri til að fara yfir þau mál sem snúa að sambandinu sjálfu.

„Ég ber virðingu fyrir því að það sé mismunandi staðið að málum í sænska knattspyrnusambandinu [þar sem Lagerbäck starfaði í 20 ár] og því íslenska. Það eru mismunandi forsendur og önnur menning,“ sagði Lagerbäck og benti á að um 130 starfsmenn eru í sænska knattspyrnusambandinu. Um 20 eru að störfum hjá KSÍ.

„Engu að síður tel ég mikilvægt að starfsmenn ræði hlutina nú og að allir þeir sem koma nálægt störfum sambandsins fái tækifæri til að fara í gegnum málum - af hverju er hitt og þetta gert á þann máta sem það er nú gert,“ segir Lagerbäck.

„Það er bæði mín reynsla og Heimis [Hallgrímssonar] að starfsfólk KSÍ er ofhlaðið vinnu. Sem dæmi má nefna að Ómar Smárason hefur sinnt nokkrum störfum,“ sagði Lagerbäck en Ómar, sem er nýhættur störfum hjá KSÍ, var fjölmiðlafulltrúi sambandsins, sem og markaðsstjóri auk þess sem hann sá um leyfiskerfi KSÍ.

Lagerbäck segir að með meira mannafli hefði mátt gera meira úr þátttöku Íslands á EM og afla þannig sambandinu enn frekari tekna.

„Það komu nokkrir aðilar að máli við mig og Heimi og vildu gera minjagripi í samstarfi við KSÍ og UEFA. Það hefði líka verið hægt að skoða hvort að mögulegt hefði verið að fara í samstarf við stór alþjóðleg fyrirtæki vegna þátttöku Íslands á EM, án þess að það yrðu hagsmunaárekstrar við þá samstarfsaðila sem KSÍ er með á Íslandi. En það hafði bara enginn tíma til að fara í þessi mál,“ segir Lagerbäck.

Geir Þorsteinsson er formaður KSÍ og segir að það sé að sumu leyti nokkur munur á því hvernig hann starfar, samanborið við þá formenn sem Lagerbäck hefur starfað undir í Svíþjóð.

„Einn stór munur er að Geir lætur sig svo margt varða og er inni í svo mörgum málum. Það getur vissulega verið gott að hann sé svo vel inni í hlutunum en það getur líka verið slæmt að forsetinn sé að skipta sér of mikið af einstökum málum, í stað þess að vinna að stórum málum eins og stefnumótun og öðru slíku.“

„Ég er ekki að segja að lausnin sé að KSÍ ráði tíu starfsmenn til viðbótar. Ég veit ekki nógu mikið um alla þætti starfssemi KSÍ til að segja það. En ég veit að það væri ef til vill hægt að vinna aðeins fagmannlegar að hlutunum,“ segir Lagerbäck sem ítrekar þó að hann beri virðingu fyrir því að það séu öðruvísi starfshættir í KSÍ og á Íslandi en hann er vanur.

„Mér finnst að mesti munurinn á Íslandi og öðrum löndum er að einstaklingurinn sér um allt í stað þess að sjá endilega heildarmyndina. Það getur líka verið styrkleiki en Íslendingar virðast oft hugsa þannig að þeir ganga einfaldlega í þau verk sem þarf að ganga í.“

„Mín sýn er að ef við gefum fleirum hlutverk þá tekur það ábyrgð á hlutunum. Þannig höfum við unnið með leikmenn. Þess vegna er ég með leiðbeiningar [e. guidelines] og mjög fáar reglur. Við segjum leikmönnum til hvers er ætlast af þeim og þeir hafa svo tækifæri til að segja sína skoðun.“

„Ef að fólk heyrir að við berum virðingu fyrir því, fær sín hlutverk og skilur af hverju þá hefur það hvetjandi áhrif á þau. Við fáum líka mun betri niðurstöðu. Það er að minnsta kosti lykilþáttur í þeirri leiðtogahæfni sem ég hef lært á mínum ferli.“

Ítarlegt viðtal Fréttablaðsins við Lars Lagerbäck, sem birtist laugardaginn 16. júlí, má sjá hér fyrir neðan. Næstu daga á Vísi verður áfram rætt við Lagerbäck um ýmis mál sem snerta íslenska karlalandsliðið í knattspyrnu, EM í Frakklandi og stöðu íþróttarinnar á Íslandi.