Tom Odell kemur til landsins í ágúst

Breski söngvarinn og lagahöfundurinn Tom Odell spilar í Eld­borgar­sal Hörpu 24. ágúst næstkomandi. Þessi ungi tónlistarmaður, en hann er einungis 25 ára gamall, hefur verið að selja nýjustu plötuna sína, Wrong Crowd, í bílförmum og auk þess hefur platan verið að fá glimrandi góða dóma. Tom mun taka lög af þessari plötu og eldra efni í bland. Eins og flestir aðdáendur Toms ættu að vita kom hann til landsins fyrir tveimur árum og spilaði á tónleikum sem fengu góða dóma og það seldist upp á þá á mjög stuttum tíma.

„Hann er ein af þessum upprennandi stjörnum í Bretlandi. Hann hélt alveg stórkostlega tónleika í Eldborg fyrir tveimur árum. Mér fannst alveg tilvalið að fá hann aftur núna því að hann var að koma með nýja plötu. Þessi plata hefur verið að fá frábæra dóma. Hann hefur látið lítið fara fyrir sér síðustu tvö ár þangað til núna í sumar og hann er ekkert að tvínóna við þetta og kemur nánast beint til Íslands,“ segir Guðbjartur Finnbjörnsson, skipuleggjandi tónleikanna, sem er nú að flytja Tom Odell til landsins í annað sinn.

„Hann er með gráðu í klassískum píanóleik, en hann er nú ekki nema 25 ára en er strax frábær píanóleikari og lagahöfundur. Þetta er vönduð rokk-popptónlist. Síðast þegar ég sá hann í Eldborg voru þetta frábærir tónleikar. Hann hefur verið að fá rosalega góða dóma fyrir hljómleikana sína, hann hitaði upp í tvö eða þrjú skipti fyrir Rolling Stones í London – þeir heyrðu tónlistina hans og vildu endilega fá hann til að hita upp fyrir sig í kjölfarið,“ segir Guðbjartur um þennan unga ljóshærða söngvara.

Tom vann BRIT critics’ choice verðlaunin árið 2013. Það ár gaf hann út sína fyrstu plötu í fullri lengd, Long Way Down, en sú plata stökk beint á topp vinsældalistans í Bretlandi. Áður hafði hann gefið út tvær EP-plötur, Songs from Another Love og The Another Love EP. Lag Toms Another Love, lagið sem kom honum á kortið, naut gífurlegra vinsælda þegar það kom út árið 2012 og fór meðal annars í tíunda sæti breska vinsældalistans og í fyrsta sætið í Belgíu. Í júní á þessu ári gaf hann út plötuna Wrong Crowd og hefur verið að fylgja henni eftir með tónleikahaldi í Bandaríkjunum og Evrópu.

Tónleikarnir verða eins og áður segir í Eldborgarsal Hörpu 24. ágúst og hefst miðasalan miðvikudaginn 3. ágúst.