Serena í sögubækurnar

Besta tenniskona allra tíma, Serena Williams, skráði sig enn á ný í sögubækurnar í nótt.

Þá komst hún auðveldlega í átta manna úrslit á US Open. Hún lagði þá Yaroslava Shvedova frá Kasakstan í tveim settum, 6-2 og 6-3.

Serena er þar með búin að vinna 308 leiki á risamótum. Fleiri en nokkur annar tenniskappi í sögunni í bæði karla- og kvennaflokki.

Roger Federer átti metið en Serena hefur nú siglt fram úr honum.

„308 er rosalega mikið. Stór tala. Mér finnst þetta mjög merkilegt og ég átti ekki von á því að ná þessu meti. Ég hélt ég myndi ekki spila svona lengi og ég hef ekki einu sinni hugmynd um hvenær ég mun hætta,“ sagði Serena.