Karlar í fjórum efstu sætum Sjálfstæðisflokksins í Kraganum

Fjögur efstu sætin á lista Sjálfstæðisflokksins í Suðvesturkjördæmi verða skipuð karlmönnum. Elín Hirst komst ekki á lista sex efstu og Bjarni Benediktsson mun leiða lista flokksins í kjördæminu. Þetta er ljóst eftir að lokatölur í prófkjörinu hafa verið birtar.

1. sæti Bjarni Benediktsson með 2479 atkvæði

2. sæti Jón Gunnarsson með 1110 atkvæði í 1.-2. sæti

3. sæti Óli Björn Kárason 1230 atkvæði í 1.-3. sæti

4. sæti Vilhjálmur Bjarnason 968 atkvæði í 1.-4. sæti

5. sæti Bryndís Haraldsdóttir 1096 atkvæði í 1.-6. sæti

6. sæti Karen Elísabet Halldórsdóttir 1266 atkvæði í 1.-5. sæti



Alls kusu 3154 einstaklingar í prófkjörinu. Framan stefndi í að Karen Elísabet yrði í fimmta sæti listans en Bryndís Haraldsdóttir skaust upp fyrir hana þegar lokatölur voru birtar.

Sú staðreynd að karlar skipi fjögur efstu sætin á listanum mun samkvæmt heimildum Vísis leiða til þess að kjörnefnd grípi inn í og breyti röðun á listanum.

Tekur niðurstöðunni með karlmennsku

Bjarni Benediktsson sagðist þakklátur fyrir stuðninginn en lýsti yfir vonbrigðum með það að kona væri ekki ofar á listanum. Hann sagðist hafa viljað sjá konu fylla í skarðið sem Ragnheiður Ríkharðsdóttir skildi eftir sig í kjördæminu en hún gefur ekki kost á sér til þingsetu.

Fram hefur komið að Bjarni hvatti Þorgerði Katrínu Gunnarsdóttur til að gefa kost á sér í annað sætið. Þorgerður Katrín sagði sig hins vegar úr flokknum og gekk í raðir Viðreisnar þar sem hún verður í framboði í Kraganum.

Þingmaðurinn Elín Hirst sem nær ekki sæti á listanum miðað við þessar tölur lýsti yfir miklum vonbrigðum en sagðist taka þeim með karlmennsku.

„Ég hef reynt að leggja mig alla fram í mínu starfi en það er greinilega ekki það sem kjósendur vilja, mínar áherslur.“

Fréttin var síðast uppfærð klukkan 22:15.

 

Bryndís Haraldsdóttir skýst upp í 5. sætið.

— Sjálfstæðisflokkur (@sjalfstaedisfl) September 10, 2016