Keflvíkingar hvolfdu bátnum þegar þeir rugguðu honum í fyrra

Keflavík er við hlið Snæfells á toppi Domino´s deildar kvenna í körfubolta eftir fyrstu níu umferðirnar. Engu að síður ákvað stjórnin í Keflavík að reka bandaríska leikmann liðsins.

Dominique Hudson er á heimleið og í stað hennar kemur Ariana Moorer. Moorer lék með Virginina í háskólaboltanum í hinni feyki sterku ACC deild. Þar var hún valin í eitt af úrvalsliðum deildarinnar. Samkvæmt pappírnum ætti hún að vera öflugur leikmaður.

Það er samt ekkert skrýtið að körfuboltáhugafólk rifji strax upp ákvörðun Keflavíkur að reka Earl Brown yngri  í fyrravetur.

Earl Brown yngri var látinn fara þegar Keflavíkurliðið var í efsta sæti Domino´s deildar karla og búið að vinna 12 af 15 leikjum sínum. Liðið var með jafnmörg stig og Íslandsmeistarar KR en Keflavíkurkonur eru með jafnmörg stig núna og Íslandsmeistarar Snæfells.

Karlalið Keflavíkur vann aðeins 3 af síðustu 7 deildarleikjum sínum eftir brotthvarf Earl Brown yngri og féll út 3-1 á móti Tindastól í átta liða úrslitunum.

Liðið sem vann 80 prósent leikja sinn á Íslandsmótinu með Earl Brown yngri innanborðs vann aðeins 36 prósent leikjanna sinn eftir að hann var rekinn (4 af 11).  

Dominique Hudson byrjaði rólega en hún var með 21,7 stig, 9,0 fráköst og 6,0 stoðsendingar að meðaltali í nóvember eftir sömu tölur höfðu verið 13,5 stig, 7,5 fráköst og 3,8 stoðsendingar í október.

Hudson hefur vaxið með hverjum leik en hefur þó ekki verið eins afgerandi og margir erlendu leikmannanna í hinum liðunum. Það hefur líka oft vantað hjá Hudson að gefa tóninn í byrjun leikja sem og að taka meiri ábyrgð í lok þeirra. Ariana Moorer fær nú það verkefni að breyta því.

Smelli Ariana Moorer inn í Keflavíkurliðið gæti hún vissulega haft margföldunaráhrif á þetta unga Keflavíkurlið.

Það verður fróðlegt að sjá hvort þessar óvæntu breytingar á leikmannahópi kvennaliðsins styrki liðið í baráttunni um deildarmeistaratitilinn eða hvort Keflvíkingar muni sjá eftir ákvörðun sinni annað árið í röð.