Eigandi Brúneggja: „Ætlum að reyna að byggja upp trúverðugleika okkar“

Kristinn Gylfi Jónsson, einn af eigendum Brúneggja, segir rekstrargrundvöll fyrirtækisins enn fyrir hendi. Næstu skref verði að reyna að byggja upp trúverðugleika Brúneggja, sem verði meðal annars gert með því að bjóða fjölmiðlum og verslunum að skoða aðstæður.

„Við erum að róa lífróður svo þessi starfsemi geti haldið áfram. Varan okkar er í lagi, okkur hefur ekki verið bannað að selja þær, og við erum með fullgilt starfsleyfi. Við erum með réttan fuglafjölda og góða aðstöðu á okkar búum,“ segir Kristinn Gylfi í samtali við Vísi.

Greint var frá því í Kastljósi í gær að fyrirtækið Brúnegg hefði um árabil blekkt neytendur með sölu á vistvænum eggjum. Þar kom einnig fram að aðbúnaði hefði verið verulega ábótavant og hænur illa hirtar. Málið hefur vakið verulegan óhug og hafa fjölmargir lýst því yfir að þeir muni sniðganga vörur Brúneggja, ásamt því sem allar helstu stórverslanir hafa tekið egg þeirra úr sölu.

Heldur í vonina

Aðspurður segist Kristinn halda í vonina um að málið muni ekki koma fyrirtækinu um koll.

„Við ætlum að reyna að byggja upp trúverðugleika okkar. Við ætlum að sýna fram á að aðstæður séu góðar hjá okkur, meðal annars með því að bjóða fjölmiðlum og verslunum að koma og skoða aðstæðurnar,“ segir hann.

„Það verður svo að ráðast hvort vörur frá okkur komist í sölu aftur og hvort neytendur vilji þær. Við höfum haft búin okkar opin fyrir fjölmiðlum í gegnum tíðina. Það sem kom fram í Kastljósi í gær eru upplýsingar liðins tíma úr eftirlitsskýrslu og eingöngu dæmi um frávik sem ekki lýsa hvernig rekstri okkar er háttar.“

Hvernig útskýrirðu þá myndskeiðin sem birt voru í Kastljósi?

„Þessi myndskeið höfum við reyndar ekki séð áður og þau voru tekin af hópi sem var slátrað stuttu síðar. Hópurinn var kominn á aldur og við lok varpskeiðs. Þetta eru auðvitað ekki góðar myndir og þær lýsa ekki stöðunni eins og hún er í dag heldur þessum frávikum á þeim tíma,“ segir Kristinn. Aðspurður hvort umrædd frávik hafi ekki verið alvarleg, að hans mati, segir hann að svo hafi verið, og að leyst hafi verið úr þeim.

„Það getur verið þannig í stórum hópi fugla að sumir líta verr út en aðrir. Þetta var ekki eðlilegt ástand og hænunum slátrað skömmu seinna.“

Þá segist Kristinn ætla að reyna hvað hann getur til að koma fyrirtækinu á skrið aftur. „Ég vona að við náum því.“

Uppfært: Anton Brink ljósmyndari leit við hjá Kristni nú síðdegis og tók eftirfarandi myndskeið.