Dreymdi í ár um að hitta þennan mann

„Ætli þetta sé ekki besta tilfinningin,“ sagði Egill Øydvin Hjördísarson, nýkrýndi Evrópumeistarinn, þegar Fréttablaðið heyrði í honum hljóðið í gær.

Kvöldið áður tryggði Egill sér gullið í léttþungavigtinni á EM í MMA í Prag. Hann varð þar með þriðji Íslendingurinn sem verður Evrópumeistari í greininni. Á EM í fyrra unnu Sunna Rannveig Davíðsdóttir og Bjarki Þór Pálsson bæði til gullverðlauna í sínum flokkum.

Í úrslitabardaganum mætti Egill Pólverjanum Pawel Zakrzewski. Egill var með yfirhöndina í bardaganum og kláraði Zakrzewski með hengingu þegar nokkrar sekúndur voru eftir af 2. lotu.

„Við vissum nokkurn veginn hvernig týpa þetta væri, hann er frekar lágvaxinn en breiður og hraustur. Mig grunaði að hann myndi hjóla í mig og reyna að henda mér. Planið var að leyfa honum ekki að taka mig niður heldur halda þessu standandi og þreyta hann. Hann var eiginlega bara búinn á því þegar komið var fram í 2. lotu á meðan ég var frekar ferskur,“ sagði Egill og bætti því við að andlegi undirbúningurinn fyrir bardagann hafi verið meira krefjandi en sá líkamlegi.

„Þetta var strembið. Það eru miklar tilfinningar í hverjum bardaga. Líkaminn var alveg til í þetta en það var erfitt að koma hausnum í gang.“

Egill tók einnig þátt á EM í Englandi í fyrra þar sem hann féll úr leik fyrir Búlgaranum Tencho Karaenev. Draumur Egils var að mæta honum aftur á EM í ár og honum varð að ósk sinni.

„Mig er búið að dreyma um að hitta þennan mann í eitt ár. Ég veit ekki hversu oft ég er búinn að ímynda mér hvernig ég ætla að vinna hann, hvað ég ætla að gera við hann. Þetta var þvílíkur léttir, mér leið eins og ég hefði unnið mótið þá. Gullið var eiginlega bara bónus,“ sagði Egill sem kláraði Karaenev með hengingu í 1. lotu. En hver var munurinn frá því í fyrra?

„Mig langaði virkilega til að keppa núna. Það var enginn efi. Ég held að það hafi verið stærsti munurinn,“ sagði Egill sem segist vera betri bardagamaður núna en hann var í fyrra. Hann byrjaði að æfa MMA sumarið 2012 en hafði engan grunn í öðrum bardagaíþróttum.

Egill sigraði Bretann Navid Rostaie í 16-manna úrslitum en í átta-manna úrslitunum kom upp sérkennileg staða. Þar dróst Egill nefnilega gegn landa sínum, herbergisfélaga og vini, Bjarna Kristjánssyni. Mistök í skráningu urðu þess valdandi að þessi staða kom upp.

„Við vorum pirraðir þegar við mættum og sáum hvernig var dregið, því það var búið að lofa okkur að þetta myndi ekki gerast. Við hefðum aldrei báðir skráð okkur í flokkinn ef við hefðum vitað að þetta væri möguleiki,“ sagði Egill og bætti því við að mótshaldarar hefðu viðurkennt mistök sín.

Egill og Bjarni börðust ekki heldur var málið leyst með því að sá síðarnefndi gaf bardagann. Bjarni fékk því engan bardaga á mótinu.

„Hann var eitthvað tæpur og átti erfitt með að sofa vegna verkja í öxlinni og var með brákað rifbein,“ sagði Egill um ástæðu þess að Bjarni ákvað að gefa bardagann.

„Þetta var mjög pirrandi. Ég hefði alveg verið til í að fara á móti honum í úrslitabardaga. Það er allt öðruvísi, þá erum við báðir sigurvegarar úr sama liðinu. En fyrir bardaga inni í miðri þvögunni fannst okkur þetta ekki þess virði,“ sagði Egill.

Egill vonast til að Evrópumeistaratitillinn opni fleiri dyr fyrir hann í MMA-heiminum.

„Þetta veitir manni gríðarlegan innblástur. Ég er núna að skoða hvort það sé ekki hægt að gera feril úr þessu, hvort ég geti ekki minnkað við mig á öðrum sviðum,“ sagði Egill sem er upptekinn maður. Hann er í fullri vinnu hjá Lögreglunni og í fullu námi í Lögregluskólanum, auk þess sem hann æfir a.m.k. tvo og hálfan tíma á dag. Þá er hans fyrsta barn væntanlegt í heiminn.

„Það er nóg að gera en maður býr bara til tíma,“ sagði Evrópumeistarinn Egill að lokum.