Síldarglaðningur á aðventunni

„Ég hef alltaf verið talsmaður fisksins og oft algerlega skipt kjöti út á aðventunni fyrir fisk,“ segir Sveinn Kjartansson, matreiðslumeistari á Aalto Bistro í Norræna húsinu.

Hann segir uppistöðuna í sinni matreiðslu þar vera fiskmeti og grænmeti í svipuðum hlutföllum.

„Í sambandi við fiskinn legg ég áherslu á þetta klassíska sem er náttúrlega síldin, líka lax í ýmsu formi og svo humar,“ lýsir hann.

Sveinn útbjó fyrir okkur annars vegar síldarrétt og hinsvegar laxarétt, einfalda fallega og holla. Hér eru leiðbeiningar frá honum um gerð þeirra.

Síldarglaðningurinn

Hráefni:

Marinerað síldarflak

Egg

Soðin kartafla

Rauðlaukur

Rúgbrauð

Þurrkaður beltisþari

Loðnuhrogn

Dill

Valhnetur

Rósapipar

Harðsjóðið eggið og kælið. Takið það í sundur og þvoið hvítuna þannig að hún sé alveg hrein. Skerið kartöfluna í bita og ristið hana í ofni, ásamt valhnetunum. Skerið rúgbrauðið í teninga.

Leggið marinerað síldarflakið á disk. Berið fram með bökuðum kartöfluteningum og valhnetum sem stráð er á diskinn, skerið rúgbrauðið í teninga og stráið þeim einnig á diskinn. Takið harðsoðið egg og skerið eggjahvítuna í teninga og setjið á diskinn á milli kartöflunnar og brauðsins.

Setjið eggjarauðuna heila á diskinn og loðnuhrognin ofan á og einnig inn á milli kartaflnanna og eggjanna. Myljið rósapipar yfir ásamt þurrkuðum beltisþara í flögum og fersku dilli. Setjið snaps í glas og berið fram með.

Síldartartar 400 g kryddlegin síld í bitum

1 rautt chilli

4 stilkar kóríander

Smá bútur engifer

1 rauðlaukur

Safi úr ½ límónu

Nýmulinn pipar.



Saxið síldina frekar fínt, saxið chilli, engifer og kóríander saman við. Kreistið límónusafann saman við, piprið og blandið saman og látið standa í ca. 40 mínútur í kæli fyrir neyslu.

Lax á brauði

Hráefni:

Gróft brauð

Reyktur lax í sneiðum

Soðinn lax

Rjómasletta

Ferskar jurtir að eigin vali

Reyktur lax í sneiðum er lagður á gróft brauð

Þar ofan á er sett laxafrauð sem gert er á eftirfarandi hátt:

Soðinn lax og reyktur lax eru maukaðir í matvinnsluvél. Út í maukið er sett smávegis af léttþeyttum rjóma og smávegis af ferskum jurtum sem fyrir hendi eru. Hrært létt.

Brauðið er svo skreytt eftir smekk hvers og eins.

 

Greinn birtist fyrst í Fréttablaðinu 26. nóvember 2016.