Stílhreint og ilmandi jólaborð

Desertkokkurinn Sylvía Haukdal Brynjarsdóttir hefur næmt auga og finnst gaman að gera fínt í kringum sig. Hún er ekki farin að halda eigin jól en býður þó yfirleitt heim um hátíðarnar. Hún gefur hugmynd að stílhreinni borðskreytingu.

„Könglana keypti ég í Rúmfatalagernum og Pier og blandaði við annað skraut sem ég átti til. Ég stillti þremur hvítum kubbakertum á dúklagt borð og raðaði könglunum og skrauti í kring. Ég dreifði svo nokkrum rósmarínlaufum yfir til að fá smá grænt á móti og góða lykt,“ útskýrir Sylvía. Hún notaði það líka til að skreyta diskana. „Ég keypti gyllta hringi í Litum og föndri og festi rósmaríngreinarnar á með vír. Hringina lagði ég svo ofan á hverja servíettu.“ Sylvía setti jafnframt nokkra köngla á háan kökudisk með glerkúpli enda vel hægt að nota slíka diska undir annað en kökur og kræsingar. Þeir fóru líka ofan í glæran kertastjaka. 

Sylvía segir þurfa að gæta þess að ofhlaða ekki borðið með skrauti enda þarf að vera pláss fyrir matinn. Hún leggur jafnframt áherslu á einfaldleikann enda yfirleitt í nægu að snúast þegar von er á gestum eða mikið stendur til. „Það er vel hægt að skreyta fallega án þess að eyða í það allt of miklum tíma.

Aðspurð segir hún að bæði hún og unnustinn hafi gaman af eldhúsverkunum. „Maðurinn minn hefur sérstaklega gaman af því að elda. Ég er meira í kökugerð og eftirréttum svo við vinnum ágætlega saman.“

Sylvía bloggaði um tíma á fagur­kerar.is en opnaði nýverið heimilis- og lífsstílsbloggið Ynjur.is ásamt sex öðrum konum. Þar gefur hún uppskriftir og hugmyndir að föndri og skrauti. „Ég er voðalegur dúllari í mér og vona að bloggið geti veitt öðrum innblástur.“ 

Sylvía er desertkokkur eða pastry chef að mennt og starfar við kökugerð hjá Sætum syndum þar sem hún fær ekki síður útrás fyrir sköpunarþörfina. Jólakaka Sætra synda í ár er hvít með gylltu blúndumunstri. Sylvía segir hana mjög dæmigerða fyrir hennar smekk.