NBA: Mjög mikil ást í fyrsta leikhluta og nýtt met | Myndbönd

Kevin Love setti nýtt stigamet í fyrsta leikhluta í sigri Cleveland Cavaliers í NBA-deildinni í körfubolta í nótt og LeBron James var með þrennu. Golden State Warriors hélt sigurgöngu sinni áfram eins og hin efstu liðin í Vestrinu; Los Angeles Clippers, San Antonio Spurs og Memphis Grizzlies.

Kevin Love skoraði 34 af 40 stigum sínum í fyrsta leikhluta þegar Cleveland Cavaliers vann 137-125 sigur á Portland Trail Blazers. Love setti með þessu nýtt stigamet í fyrsta leikhluta í NBA og var jafnframt aðeins þremur stigum frá því að jafna met Klay Thompson í einum leikhluta frá 23. janúar 2015.

Love hitti úr 11 af 14 skotum sínum í þessum ótrúlega fyrsta leikhluta þar af fóru 8 af 10 þriggja stiga skotum hans rétta leið. Cleveland-liðið setti nýtt félagsmet með tuttugu þristum.

LeBron James var með þrennu í leiknum, þá 44. á NBA-ferlinum. James endaði leikinn með 31 stig, 10 fráköst og 13 stoðsendingar en þetta var önnur þrenna hans á tímabilinu.

Damian Lillard var með 40 stig og 11 stoðsendingar fyrir Portland Trail Blazers og Mason Plumlee skoraði 19 stig.

Skytturnar þrjár voru í stuði í auðveldum 43 stiga sigri Golden State Warriors á Los Angeles Lakers, 149-106. Stephen Curry var með 31 stig og 9 stoðsendingar á 29 mínútum en hann hitti úr 7 af 12 þriggja stiga skotum sínum, Kevin Durant skoraði 28 stig á 30 mínútum og Klay Thompson var með 26 stig á 24 mínútum.

Ian Clark hitti úr öllum fimm þriggja stiga skotum og endaði með 21 stig á 18 mínútum en samanlagt var Golden State með 19 þrista úr aðeins 36 skotum (53 prósent). Skytturnar þrjár skoruðu 13 af þessum þriggja stiga skotum úr 23 skotum. Warriors-liðið hefur þar með unnið níu leiki í röð og 13 af 15 leikjum tímabilsins.

Austin Rivers var með 22 stig fyrir Los Angeles Clippers í 124-104 útisigri á  Dallas Mavericks. Chris Paul skoraði 18 stig og DeAndre Jordan var með 16 stig og 8 fráköst fyrir Clippers í uppgjöri efsta og neðsta liðs deildarinnar.

Dirk Nowitzki var með 10 stig á 20 mínútum fyrir Dallas en hitti aðeins úr 3 af 10 skotum. Þjóðverjinn var að koma til baka eftir átta leikja fjarveru vegna hásinameiðsla.

Kawhi Leonard skoraði 30 stig fyrir San Antonio Spurs í 119-114 sigri á Charlotte Hornets en þetta var sjöundi sigur Spurs-liðsins í röð. LaMarcus Aldridge var með 23 stig fyrir San Antonio og Danny Green skoraði 16 stig. San Antonio Spurs hefur þar með unnið alla átta útileiki tímabilsins.

Kemba Walker var atkvæðamestur hjá Charlotte með 26 stig, 9 fráköst og 8 stoðsendingar. Þetta var þriðja tap í röð en Hornets-liðið vann 8 af fyrstu 11 leikjum tímabilsins.

Marc Gasol skoraði 27 stig og Mike Conley var með 25 stig þegar Memphis Grizzlies vann Philadelphia 76ers 104-99 eftir tvíframlengdan leik. Þetta var sjötti sigur Memphis í röð. Conley var einnig með 9 fráköst og 9 stoðsendingar fyrir Memphis sem lenti mest 11 stigum undir í seinni hálfleik en kom til baka.

DeMarcus Cousins var með 36 stig og 13 fráköst þegar Sacramento Kings vann Oklahoma City Thunder 116-101. Russell Westbrook skilaði tonn af tölfræði annað kvöldið í röð en varð að sætta sig við tap alveg eins og í fyrrinótt. Westbrook var með 31 stig, 11 fráköst og 9 stoðsendingar í nótt en 34 stig, 8 fráköst og 13 stoðsendingar kvöldið áður.

Anthony Davis var með 45 stig og 10 fráköst þegar New Orleans Pelicans vann 117-96 sigur á Minnesota Timberwolves. Þetta var þriðji 40 stiga leikur Davis á tímabilinu og fjórði sigurleikur Pelíkananna í röð.

Isaiah Thomas skoraði 23 stig, Avery Bradley var með 22 stig og Al Horford bætti við 17 stigum þegar Boston Celtics vann Brooklyn Nets 111-92. Þetta var þriðji sigur Boston-liðsins í röð.

Úrslit leikja í NBA-deildinni í nótt:

Golden State Warriors - Los Angeles Lakers        

Sacramento Kings - Oklahoma City Thunder

New Orleans Pelicans - Minnesota Timberwolves    117-96    

Utah Jazz - Denver Nuggets    108-83    

Dallas Mavericks - Los Angeles Clippers    104-124    

Houston Rockets - Toronto Raptors    102-115    

Brooklyn Nets - Boston Celtics    92-111    

Detroit Pistons - Miami Heat    107-84    

Charlotte Hornets - San Antonio Spurs    114-119    

Cleveland Cavaliers - Portland Trail Blazers    137-125    

Indiana Pacers - Atlanta Hawks    85-96    

Orlando Magic - Phoenix Suns    87-92    

Philadelphia 76ers - Memphis Grizzlies    99-104 (86-86)