Apple hyggst fjárfesta í sjálfkeyrandi bílum

Stórfyrirtækið Apple hefur viðurkennt í fyrsta skiptið að það hyggst fjárfesta í tækni tengdri sjálfkeyrandi bílum. Þetta kemur fram í bréfi fyrirtækisins til bandarískra samgönguyfirvalda. BBC greinir frá.

Í umræddu bréfi kemur fram að Apple telur að gríðarlegan samfélagslegan ávinning megi hafa af sjálfkeyrandi bílum í framtíðinni. Orðrómar um að fyrirtækið hyggðist beita sér í þessum geira hafa lengi verið uppi, en ekki verið staðfestir þar til nú. 

Talsmaður Apple sagði að í bréfinu til samgönguyfirvalda hefði fyrirtækið lagt áherslu á mikilvægi þess að ríkisvaldið sýndi hófsemi í reglugerðum fyrir sjálfkeyrandi bíla. Þetta væri nauðsynlegt til að tryggja að gömlum sem og nýjum bílaframleiðendum væri ekki mismunað.

Leggja til að fyrirtæki sameini krafta sína

Apple lagði jafnframt til að fyrirtæki sem væru að framleiða sjálfkeyrandi bíla eða hyggðust gera slíkt myndu sameina krafta sína.

Þannig væri hægt að vinna saman að þróunarstarfi bílanna með því að deila upplýsingum um árekstra og önnur lítilvægari óhöpp. Þetta gæti tryggt betri og öruggari aksturskerfi fyrir bílana. 

Mikilvægt væri að hið opinbera ætti í samstarfi við fyrirtækin um réttláta deilingu og meðferð slíkra upplýsinga.

Ekki er ljóst hvort að Apple hyggst framleiða eigin sjálfkeyrandi bíl. 

Uppi hafa verið kenningar um að fyrirtækið hafi hætt við þau plön til þess að einbeita sér þess í stað að því að framleiða hugbúnað fyrir sjálfkeyrandi bíla sem aðrir framleiðendur geta nýtt sér.