Kvöldfréttir Stöðvar 2 í beinni

Mál konu sem hætti við að kæra nauðgun er í forgangi hjá lögreglu. Konan er undir eftirliti lögreglu og nýtur verndar. Fjallað verður um málið í kvöldfréttum Stöðvar 2 í kvöld en þar verður rætt við Jón HB Snorrason, aðstoðarlögreglustjóra. Maðurinn sem er grunaður um að hafa nauðgað henni afplánar nú eftirstöðvar annars fangelsisdóms sem hann hlaut árið 2012. Rannsókn beinist einnig að mönnum sem grunaðir eru um að hafa hótað konunni.

Einnig verður fjallað um stjórnarmyndun í kvöldfréttum en formenn Sjálfstæðisflokks, Bjartrar framtíðar og Viðreisnar hafa varist allra fregna af viðræðum þeirra undanfarna sólarhringa. Formenn Viðreisnar og Bjartrar framtíðar kynntu málefnatillögur fyrir formanni Sjálfstæðisflokksins í gær.

Við ræðum síðan við Skúla Mogensen, stofnanda WOW air, en hann er sannfærður um að félagið geti orðið eitt af öflugri lággjaldaflugfélögum í heimi. Skúli Mogensen er Viðskiptamaður ársins að mati fréttastofu þrír sex fimm.

Við fjöllum einnig um útsölur og skilarétt neytenda en dæmi eru um að útsölur hafi byrjað strax á fyrsta opnunardegi eftir jól. Þannig hafa margir ekki fengið fullt verð fyrir vörur sínar. Formaður Neytendasamtakanna segir þetta óviðunandi.

Leikkonan Carrie Fisher, sem sló í gegn með túlkun sinni á Lilju prinsessu í Stjörnustríðsmyndunum, skipar sérstakan sess í kvöldfréttunum. Margir minnast Fisher en hún lést í gær og við ræðum við eldheita en sorgmædda Stjörnustríðsaðdáendur.

Þetta og meira til í kvöldfréttum Stöðvar 2, á samtengdum rásum Stöðvar 2 og Bylgjunnar og í beinni útsendingu á fréttavefnum Vísi.