Hjálparlínu fyrir aðstandendur skipverja Polar Nanoq bárust tuttugu símtöl

Utanríkismálaskrifstofa Grænlands hefur nú látið lokað sérstakri hjálparlínu sinni sem ætluð var til að aðstoða aðstandendur skipverja á togaranum Polar Nanoq í tengslum við mál Birnu Brjánsdóttur.

Þetta kemur fram í frétt grænlenska fjölmiðilsins Sermitsiaq.

Alls bárust línunni um tuttugu símtöl frá því að hún var opnuð fimmtudaginn 19. janúar síðastliðinn.

Togarinn sigldi úr höfn í Hafnarfirði klukkan ellefu í gærkvöldi eftir að heimild barst frá íslenskum yfirvöldum. Sökum þessa er ekki talin þörf á að hafa hjálparlínuna opna áfram, en hún hefur verið opin allan sólarhringinn síðustu daga.

Tveir grænlenskir skipverjar eru nú í gæsluvarðhaldi vegna gruns um að tengjast morðinu á Birnu Brjánsdóttur.