Galaxy S8 símarnir verða lítið annað en skjáirnir

Skjáir nýjustu símar Samsung, Galaxy S8, munu nánast fylla upp í alla framhlið þeirra. Báðar útgáfur símanna verða með ávalar hliðar og á botni þeirra verða innstungur fyrir heyrnartól. Þetta hefur Guardian eftir heimildarmönnum sem lýstu símunum fyrir blaðamönnum.

Þeir segja að rammarnir utan um skjái símanna verði svo litlir að Samsung muni ekki geta komið einkennismerki fyrirtækisins fyrir á framhlið símanna. Auk þess munu eigendur þeirra geta aflæst símanna með því að skanna augu sín.

Bgr birti nýverið myndir sem þeir segja af skjáhlífum fyrir S8.

Vegna vandræða með útgáfu Galaxy S7 símanna verða nýju símarnir ekki kynntir á Mobile World ráðstefnunni í Barcelona í næsta mánuði, eins og undanfarin ár. Þess í stað verða þeir kynntir í seinni hluta mars og verða gefnir fyrst út þann 21. apríl.

Þá verða S8 símarnir um fimm tommur að stærð og Note símarnir verða um sex tommur. Stærðirnar verða sem sagt sambærilegar við síðustu útgáfur Samsung.

Guardian hefur einnig heimildir fyrir því að myndavélar símanna verði sambærilegar og þær sem voru í S7 símunum. Þó verður innbyggt í símanna gervigreind sem á að geta borið kennsl á hluti í gegnum myndavélina.

Örgjörvar símanna verða nýir og smíðaðir eftir nýrri aðferð Samsung. Slíkir örgjörvar eru sagðir vera allt að þriðjungi fljótvirkari en aðrar gerðir af sömu stærð og sömuleiðis notast við minna rafmagn.