Lögreglan engu nær um ferðir rauða bílsins á laugardagsmorgun

Grímur Grímsson, yfirlögregluþjónn sem stýrir rannsókninni á hvarfi Birnu Brjánsdóttur, segir lögregluna engu nær um ferðir rauða Kia Rio-bílsins á laugardagsmorgun milli klukkan 7 og 11:30. Á föstudag óskaði lögregla eftir myndefni úr bílum sem voru á ferð á þessum tíma á stóru svæði á suðvesturhorninu. Aðeins var óskað eftir myndefni sem kann að sýna rauðan Kia Rio en Grímur segir ekkert slíkt myndefni hafa komið fram.

Þá hefur ökumaður hvíta bílsins sem sést á mynd í Hafnarfjarðarhöfn í hádeginu á laugardag og lögregla lýsti eftir ekki gefið sig fram.

„Við höfum fengið margar ábendingar um hvaða bíll þetta geti verið en það hefur ekki borið árangur að við teljum okkur vera kominn með hann,“ segir Grímur.

Tekist hefur að kortleggja ferðir rauða bílsins með nokkuð nákvæmum hætti frá því klukkan 05:25 til klukkan 7 innan höfuðborgarsvæðisins út frá eftirlitsmyndavélum og gögnum úr farsíma Birnu og grænlensku mannanna tveggja sem sitja í gæsluvarðhaldi grunaðir um aðild að hvarfinu.

Útilokað að bíllinn hafi farið um Hvalfjarðargöng

Í raun má segja að það eina sem liggi fyrir um ferðir bílsins frá klukkan 7 er að búið er að útiloka að hann hafi farið ofan í Hvalfjarðargöngin þar sem bíllinn sést ekki á neinum myndavélum þar. Aðspurður hvort annað myndefni, til að mynda frá Vegagerðinni, gefi engar vísbendingar um ferðir bílsins segir Grímur:

„Við höfum ekki getað notað gögn úr myndavélum til þess að vera 100 prósent viss. Eins og í Hvalfjarðargöngunum þá er það nokkuð afmarkað hvaða bílar fara ofan í göngin en við höfum ekki getað notað annað myndefni til þess að staðsetja. En ég er fullviss um það að við erum með allt myndefni sem að er til nema þá það sem er í einkaeigu og viðkomandi veit ekki af því.“

Lögreglan vinnur út frá þeirri tilgátu að Birna hafi farið upp í bílinn á Laugavegi en komið hefur fram að ekkert bendir til þess að Birna og mennirnir hafi átt í einhverjum samskiptum áður. Þau sjást hvorki ræða saman á því myndefni sem til er úr miðbæ Reykjavíkur umrædda nótt né má merkja einhver samskipti á samfélagsmiðlum.

Ekki áætlað að yfirheyra mennina í dag

Grímur segir lögregluna ekki vita hvers vegna Birna hefur farið upp í bílinn; hvort að hún hafi ætlað að fá far eða hvort hún hafi mælt sér mót við mennina.

„Þarna erum við ef svo má segja alveg í myrkri. Auðvitað er þetta hlutur sem maður ætti að spyrjast fyrir um og fá upplýsingar í yfirheyrslum en við höfum ekki fengið þessar upplýsingar. Það að velta svo fyrir sér huglægum hvata hennar fyrir að fara upp í bílinn, það er eitthvað sem verða aldrei neitt annað en vangaveltur.“

Að sögn Gríms er ekki fyrirhugað að yfirheyra mennina í dag nema eitthvað komi upp sem kalli á það en mennirnir eru báðir í einangrun á Litla-Hrauni. Grímur segist reikna með því að þeir verði yfirheyrðir á morgun þó vel geti verið að það verði ekki gert fyrr en á þriðjudag.

Umfangsmikil leit fer fram að Birnu í dag en á meðan mun lögreglan halda áfram að vinna úr sínum rannsóknargögnum.