Ekki hægt að fullyrða að slökkt hafi verið handvirkt á síma Birnu

Lögreglan getur ekki lengur fullyrt að slökkt hafi verið handvirkt á farsíma Birnu Brjánsdóttur við Flathraun í Hafnarfirði eins og áður var talið. Tveir menn sem úrskurðaðir voru í gæsluvarðhald vegna málsins í fyrradag neita ennþá sök en þeir sæta einangrun á Litla hrauni.

Tveir menn sem úrskurðaðir voru í gæsluvarðhald í fyrradag í tengslum við hvarf Birnu Brjánsdóttur voru fluttir á Litla Hraun í gærkvöld. Þeir hafa ekki verið yfirheyrðir í dag.

„Við yfirheyrðum þá nokkuð stíft dagana eftir handtökuna og ætlum ekki að yfiheyra þá um helgina nema einhverjar nýjar upplýsingar koma fram sem að kalli á það,” segir Grímur Grímsson, yfirlögregluþjónn sem stýrir rannókninni á hvarfi Birnu.

En hugsanlega eftir helgi?

„Já”

Eru þeir í einangrun?

„Já.”

Og þeir gera ekki rætt saman?

„Nei, þeir geta einvörðungu rætt við lögmenn sína,” segir Grímur.

Höfðu tækifæri til að samræma framburð

Hann segist ekki geta tjáð sig um hugsanlega aðild hvors þeirra um sig að málinu en þeir neita báðir sök.

Þeir fara úr landi á laugardeginum og það líða um það bil eitt hundrað klukkustundir þar til sérsveitin kemur um borð og handtekur þá. Er eitthvað sem bendir til þess að þeir hafi samræmt framburð sinn í málinu?

„Án þess að ég fari út í þeirra framburð í málinu að þá blasir við að menn hafi haft tækifæri til þess. Það er ljóst að þeir vissu að lögreglan á Íslandi hafði áhuga á að ná tali af þeim. Þannig að það blasir við að þeir gátu gert það,” segir Grímur.

Tilgátan að Birna hafi verið í bílnum

Lögreglan býr yfir upplýsingum, meðal annars út frá farsímagögnum og myndum úr eftirlitsmyndavélum, um ferðir mannanna þennan laugardagsmorgun.Hins vegar hefur lögreglu ekki tekist að kortleggja ferðir mannanna síðar um morguninn, frá klukkan sjö til hálf tólf.

Hann segir lögregluna vinna út frá tiltekinni tilgátu í málinu.

„Tilgátan er sú að hún hafi farið upp í bílinn á laugavegi á móti húsi númer 31. Síðan hafi bíllinn farið til Hafnarfjarðar og þar getum við séð bílinn en ekki Birnu. En við teljum að hún hafi verið í bílnum.”

Ekki hægt að fullyrða að slökkt hafi verið handvirkt á símanum

Lögreglan greindi frá því fyrr í vikunni að slökkt hafi verið handvirkt á síma Birnu klukkan 5.50 þegar hann tengdist símamastri við Flatahraun í Hafnarfirði. Grímur segir lögregluna nú hafa fengið betri upplýsingar frá sérfræðingum. Lögreglan geti því ekki lengur fullyrt að slökkt hafi verið handvirkt á símanum og því gæti allt eins verið að hann hafi orðið batteríslaus.

„Við getum ekki staðfest það. Við töldum okkur geta sagt það. Töldum að okkur hefði verið sagt að við gætum það, en það er ekki rétt,” segir Grímur.