Spacex skaut upp eldflaug vandkvæðalaust

Geimkönnunarfyrirtækið SpaceX, sem er í eigu Elon Musk, tókst í dag að skjóta upp mannlausri eldflaug, sem bar hylki sem hefur að geyma birgðir fyrir alþjóðlegu geimstöðina. Fyrirtækið hafði áður þurft að fresta geimskotinu sem átti að fara fram á laugardag, eftir tæknileg vandræði. BBC greinir frá.

Flauginni var skotið upp af Kennedy geimskotpallinum í Flórída og náði eldflaugin að lenda níu mínútum eftir flugtak. Er það hluti af nýrri tækni sem fyrirtækið nýtir sér svo hægt sé að nýta eldflaugarnar oftar en einu sinni.

Fyrirtækið hafði áður lent í vandræðum í september, þegar sambærileg mannlaus eldflaug á vegum fyrirtækisins sprakk í loft upp við flugtak.

Búist er við að að hylkið muni berast alþjóðageimstöðinni á miðvikudag. Starfsemi fyrirtækisins fer stöðugt vaxandi en eigandi þess, Elon Musk, hefur áður lýst því yfir að fyrirtækið eigi að vera leiðandi af þegar kemur að því að gera mannkyninu kleyft að setjast að á öðrum plánetum.