Klay Thompson skoraði 36 stig þegar Golden State Warriors bar sigurorð af Memphis Grizzlies á útivelli, 107-122.
Draymond Green var með afar sérstaka þrennu í liði Golden State. Hann skoraði aðeins fjögur stig í leiknum en tók 12 fráköst, gaf 10 stoðsendingar og stal 10 boltum. Þá varði Green fimm skot.
Golden State er á toppnum í Vesturdeildinni með 45 sigra og átta töp.
Ótrúleg sigurganga Miami Heat heldur áfram en í nótt vann liðið níu stiga sigur, 99-108, á Brooklyn Nets.
Þetta var þrettándi sigur Miami í röð en liðið nálgast óðfluga sæti í úrslitakeppninni.
James Johnson skoraði 26 stig af bekknum hjá Miami og Goran Dragic skilaði 21 stigi. Alls skoruðu varamenn Miami 56 stig í leiknum.
Kawhi Leonard skoraði 32 stig þegar San Antonio Spurs vann Detroit Pistons á útivelli, 92-103.
Miðherjinn Dewayne Dedmon skoraði 17 stig og tók 17 fráköst í liði San Antonio sem er í 2. sæti Vesturdeildarinnar.
Þá vann Washington Wizards sinn níunda sigur í síðustu 10 leikjum þegar liðið lagði Indiana Pacers að velli í höfuðborginni, 112-107.
Markieff Morris og John Wall skoruðu 26 stig hvor fyrir Washington. Sá síðarnefndi gaf einnig 14 stoðsendingar.
Washington er í 3. sæti Austurdeildarinnar.
Úrslitin í nótt:
Memphis 107-122 Golden State
Brooklyn 99-108 Miami
Detroit 92-103 San Antonio
Washington 112-107 Indiana
NY Knicks 123-131 Denver
Milwaukee 114-122 LA Lakers
Minnesota 106-122 New Orleans
Sacramento 108-107 Atlanta
Phoenix 115-97 Chicago
