KR-ingar búnir að tapa sex leikjum í röð í úrslitakeppni í Reykjanesbæ

30. mars 2011. Mörgum finnst langt liðið síðan enda erum við að tala um sex ár og tólf dagar eða í það heila 2204 daga.

Þetta er samt dagurinn þegar KR-ingar fögnuðu síðast sigri í úrslitakeppni í Reykjanesbæ. KR-ingar geta bætt úr því í kvöld og tryggt sér sæti í úrslitaeinvíginu fjórða árið í röð.

Keflavík tekur á móti KR í fjórða leik undanúrslitaeinvígis liðanna en staðan er 2-1 fyrir KR. Leikurinn hefst klukkan 19.15 og verður sýndur beint á Stöð 2 Sport.

KR-liðið hefur spilað sex leiki í úrslitakeppni í Keflavík eða Njarðvík frá þessum vordegi fyrir rúmum sex árum og í öll skiptin hafa KR-ingar orðið að sætta sig við tap.

Nú síðasta tapaði KR með sjö stigum í Keflavík í þessu sama undanúrslitaeinvígi þegar Keflvíkingar jöfnuðu metin í 1-1 með 81-74 sigri.

Síðustu tvö tímabil á undan höfðu KR-ingar tapað alls fjórum leikjum í Ljónagryfjunni eða öllum útileikjum liðsins í undanúrslitaseríum sínum á móti Njarðvík 2015 og 2016. Friðrik Ingi Rúnarsson þjálfari Njarðvíkurliðið bæði þessi tímabil en hann þjálfar einmitt Keflavíkurliðið núna.

Sjötti leikurinn er síðan fjórði leikur KR og Keflavík í undanúrslitaeinvígi liðanna 2011. Keflavík vann þá eins stigs sigur í framlengingu og tryggði sér oddaleik.

KR vann síðast í Reykjanesbæ í úrslitakeppni í öðrum leik undanúrslitaeinvígis síns á móti KR 2011 en KR-ingar unnu þá 18 stiga sigur, 105-87, og komust í 2-0 í einvíginu. Keflvíkingum tókst að vinna tvo næstu leiki og koma einvíginu í oddaleik.

KR-ingar eru vanir því að klára seríur á útivelli í fjórða leik undir stjórn Finns Freys Stefánssonar nema að leikurinn sé í Reykjanesbæ.

Síðan Finnur Freyr tók við KR-liðinu hafa Vesturbæingar spilað sex sinnum leik fjögur í seríu. Þeir hafa unnið hann og þar með einvígið í öll fjögur skiptin sem spilað var utan Reykjanesbæjar en tapað í bæði skiptin þegar leikurinn fór fram í Reykjanesbæ (Njarðvík).



Síðustu sjö leikir KR í úrslitakeppni í Reykjanesbæ:

Undanúrslit 2017

7 stiga tap í Keflavík (74-81)

Undanúrslit 2016

6 stiga tap í Njarðvík (68-74)

2 stiga tap í Njarðvík (86-88)

Undanúrslit 2015

16 stiga tap í Njarðvík (81-97)

1 stigs tap í Njarðvík (84-85)

Undanúrslit 2011

1 stigs tap í Keflavík (103-104)

18 stiga sigur í Keflavík (105-87)