Löggæsla á bæjarhátíðum í uppnámi

Sú ákvörðun atvinnuvega- og nýsköpunarráðuneytisins að fella niður heimild lögreglu til að innheimta löggæslukostnað á bæjarhátíð um síðustu Verslunarmannahelgi hefur sett gæslu á slíkum hátíðum í uppnám. Mörg sambærileg mál eru nú á borði ráðuneytisins þar sem farið er fram á að gjaldið verði fellt niður.

Í aðdraganda Verslunarmannahelgarinnar á síðasta ári stóð Fjallabyggð að undirbúningi Síldarævintýrisins á Siglufirði og þegar bærinn óskaði eftir tækifærisleyfi fyrir hátíðarhöldum fór Lögreglustjórinn á Norðurlandi Eystra fram á að bæjarfélagið myndi greiða löggæslukostnað til að fá leyfið í gegn.

Hefði bæjarfélagið ekki greitt þennan kostnað hefði verið líklegt að bæjarfélagið fengi ekki tækifærisleyfi fyrir hátíðarhöldunum en  Gunnar I. Birgisson, bæjarstjóri í Fjallabyggð kærði málið til atvinnu- og nýsköpunarráðuneytisins sem úrskurðaði um málið í byrjun mánaðarins. Þar er ákvörðun lögreglustjórans um innheimtu löggæslukostnaðar vegna bæjarhátíðarinnar felld úr gildi.

Spurningin sem hefur vaknað eftir úrskurð ráðuneytisins er hvort á kvörðunin sé fordæmisgefandi fyrir aðrar bæjarhátíðir sem haldnar eru um landið.

Það er erfitt að segja hvaða áhrif hann getur haft á aðrar bæjarhátíðir því í úrskurðinum kemur einnig fram að bæjarhátíðir geti verið þannig að það sé hægt að innheimta löggæslukostnað,” segir Halla Bergþóra Björnsdóttir, lögreglustjóri á Norðurlandi eystra.

Halla segir að fleiri mál eins og þetta séu til meðferðar hjá ráðuneytinu og segir hún að beðið verði með viðbrögð þar til úrskurðir í þeim málum liggi fyrir.

„Ég hugsa að ég bíði eftir því og sjái hvaða leiðbeiningar ráðuneytið kemur fram með í þeim úrskurði og kannski í kjölfarið af því held ég að það sé alveg tilefni til þess að fara með það í dómsmálaráðuneytið og fara aftur yfir þessi mál.“

Vegna þeirra hátíða sem haldnar eru yfir sumarmánuðina þarf lögreglan á Norðurlandi eystra að leggja út í mikinn kostnað vegna þeirra hátíða.

Ljóst er að ekki verður innheimtur löggæslukostnaður sæki Fjallabyggð aftur um tækifærisleyfi fyrir Síldarævintýrinu á Siglufirði um næstu Verslunarmannahelgi en fjölmargar aðrar hátíðir eru fyrirhugaðar á svæðinu í ár eins og Bíladagar, Sumleikarnir á Akureyri og Mærudagar á Húsavík.