Gæsahúðarmyndband frá úrslitaleiknum árið 2009

„Það er ekki hægt að koma einu einasta kvikindi í viðbót fyrir inn í íþróttahúsinu,“ sagði Guðjón „Gaupi“ Guðmundsson fyrir oddaleik KR og Grindavíkur árið 2009.

Nú átta árum síðar er nákvæmlega sama staða í körfuboltanum. KR og Grindavík munu spila hreinan úrslitaleik um titilinn í Vesturbænum á sunnudag.

Síðast mættu um 2.500 manns og stemningin var engu lík. Þeir sem þangað mættu eru enn að tala um það og geta ekki hætt því.

DHL-höllin var algjörlega pökkuð og er ekki við öðru að búast en að þannig verði það á sunnudag.

Það var ekki bara að rimma liðanna fyrir átta árum færi í oddaleik heldur réðust úrslit leiksins í síðustu sókninni.

Grindvíkingar með boltann og einu stigi undir. Enginn þorði að taka skotið og KR vann leikinn. Ógleymanlegur leikur tveggja frábærra liða.

Sjá má þetta geggjaða myndband hér að neðan.