Fregnir herma að breska stjörnuparið Cheryl Cole og Liam Payne hafi nefnt son sinn, sem fæddist þann 22. mars síðastliðinn, í höfuðið á einum af risum dýraríkisins. The Telegraph greinir frá því að drengurinn hafi hlotið nafnið Bear, eða Björn á íslensku.
Hinir nýbökuðu foreldrar eru sagðir hafa sæst á nafnið stuttu eftir að sonurinn kom í heiminn. Þeim þykir það sæma stráknum vel en hann mun enn fremur bera eftirnafn föður síns, Payne.
Nafnið Bear virðist vinsælt í heimi stjarnanna en synir leikkvennanna Kate Winslet og Aliciu Silverstone heita báðir nafninu. Þá á kokkurinn Jamie Oliver einnig son sem heitir Bear.
