Hagnaður Emirates tók mikla dýfu

Á síðastliðnu viðskiptaári lækkaði hagnaður flugfélagsins Emirates um 82 prósent. Ástæður þess voru meðal annars minni eftirspurn eftir ferðalögum og atvik sem ollu óstöðugleika, meðal annars áform Trumps Bandaríkjaforseta.

CNN greinir frá því að arðgreiðslur voru afturkallaðar hjá félaginu í fyrsta skipti síðan árið 1996. Til samanburðar greiddi félagið ríkisstjórn Dubai 681 milljón dollara í arð á síðasta ári, en þá nam hagnaður félagsins 7,1 milljarði dollara.

Stjórnarformaður Emirates, Sheikh Ahmed bin Saeed Al Makt­oum, segir síðasta árið hafa verið eitt það erfiðasta í sögu félagsins og sér hann fram á annað erfitt ár fram undan. Hann segir það meðal annars skýrast af aukinni samkeppni og óstöðugleika á mörkuðum sem hafa áhrif á eftirspurn eftir flugi.

Í síðasta mánuði var tilkynnt að Emirates væru að draga úr flugferðum til Bandaríkjanna vegna neikvæðra áhrifa af stefnu Trumps.