Spyr hvað fólkið sem felldi tár ætli að gera í málunum

Bryndís Gunnlaugsdóttir, körfuboltakempa og fyrrverandi forseti bæjarstjórnar í Grindavík, gerir nýja auglýsingu Icelandair í tilefni Evrópumóts kvennalandsliða í knattspyrnu að umræðuefni á Facebook-síðu sinni. Hún segist hafa fengið tár í augun eins og hálf þjóðin en það sem skipti máli sé að gera eitthvað í málunum. Ekki gráta og aðhafast ekkert.

Óhætt er að segja að auglýsingin hafi vakið mikla athygli þar sem fylgst er með ungri stelpu mæta mótlæti í yngri flokkum knattspyrnu þar sem drengir eru í fyrsta sæti og stúlkur ekki. Skilaboðin eru þau að gefast ekki upp þótt á móti blási og gefur auglýsingin til kynna að um uppvaxtarár Margrétar Láru Viðarsdóttur, landsliðsfyrirliða og markahæsta landsliðsmann Íslandssögunnar, sé að ræða.

„Ég eins og hálf þjóðin fékk tár í augun við að sjá hjartnæma auglýsingu Icelandair tengda EM kvenna í knattspyrnu. Þar var sýnt það órétti sem mætir almennt konum í íþróttum, fá ekki að vera með, þurfa að hafa meira fyrir þessu, fá minni bikar og svo mætti lengi telja,“ segir Bryndís í pistli sínum.

„Stór hluti þjóðarinnar er sammála því að þetta er ósanngjarnt og þau vilja ekki hafa samfélagið okkar svona - þess vegna komu tárin - en hvað ætlar þetta sama fólk að gera núna? Svona auglýsingar skila engum árangri ef þeir sem gráta yfir auglýsingunni breyta ekki hegðun sinni og leggja sitt af mörkum.“

Bryndís leggur til að fólk sem varð fyrir áhrifum af auglýsingunni geri eitthvað í málunum. Birtir hún lista með tillögum sínum til að styrkja kvennaíþróttir.

1) Ef þú átt fyrirtæki - stattu með kveníþróttum og þegar þú styrkir íþróttafélag taktu fram að þú viljir að skipting fjármuna sé 50/50 í kk og kvk (öll önnur skipting er misrétti)

2) Ef þú ert fyrrverandi íþróttakona í EINHVERRI íþrótt - farðu í þitt gamla félag eða félag sem er nálægt þér og leggðu þitt af mörkum sem stjórnarmaður, sjálfboðaliði, þjálfari, fjáraflari eða hvað annað sem hægt er að gera til að styðja við kveníþróttir

3) Ef þú ert í stjórn íþróttafélags - sjáðu til þess að umgjörð og metnaður félagsins sé sambærilegur fyrir bæði kyn.

4) Viltu fá meiri árangur hjá kvennaliðum? Settu þá hæfa þjálfara á kvenNlið - það er allt of algengt að kvenlið fá lélegri þjálfara - bæði reynsluminni og minna menntaðir. Augljóslega mun árangurinn og metnaðurinn vera í samræmi við það!

5) Ertu karlmaður? Taktu þátt í jafnréttisbaráttunni því allir karlmenn eiga a.m.k. móður og ef ekki fyrir móður þína þá fyrir allar aðrar konur í lífi þínu - nú eða fyrir drengi þína því ójafnrétti kynja bitnar á báðum kynum.

6) Mættu á leik og keppni hjá kveníþróttum

Bryndís var á dögunum heiðruð á ársþingi Körfuknattleikssambands Íslands fyrir hennar framlag til íþróttarinnar en hún hefur gegnt stjórnarstörfum og unnið sjálfboðaliðastarf fyrir hreyfinguna undanfarin ár. Hennar skilaboð eru skýr:

„Ekki gráta og gera svo ekkert!!!“

Sterk liðsheild. Sterkir einstaklingar. Framundan er EM 2017 í Hollandi. Óstöðvandi #FyrirÍsland pic.twitter.com/zg9Gq3owvA

— Icelandair (@Icelandair) May 9, 2017