„Opinbera heilbrigðiskerfinu er haldið við sultarmörk meðan fjármunir renna ljúflega í einkarekstur“

Logi Einarsson, formaður Samfylkingarinnar, fór um víðan völl í ræðu sinni á eldhúsdegi á Alþingi í kvöld og gagnrýndi stefnu ríkisstjórnarinnar á ýmsum sviðum. Hann vakti til að mynda athygli á þeim hröðu tæknibreytingum sem nú eru að verða með tilkomu gervigreindar og sagði að vélar væru þannig farnar að hlusta, tala og skilja.

Þær þyrftu því ekki daglega stjórn frá mönnum til að leysa margbreytilega og flókin verkefni og þannig myndu störf sem bæði háskólamenntaðir og minna menntaðir sinna hverfa með tímanum. Við þyrftum að undirbúa okkur fyrir slíka framtíð og sagði Logi menntun vera lykilþátt í því.

„Skapandi hugsun og tölvufærni mun verða lykilþáttur í þróun atvinnulífsins. Ekkert í stefnu stjórnarinnar mætir þessu: Framlag til framhaldsskóla, háskóla og nýsköpunar eru í engu samræmi við það sem þau þyrftu að vera. Áfram verða íslenskir háskólar hálfdrættingar á við það systurskóla sína Norðurlöndunum. Loforð um að framhaldsskólarnir njóti hagræðingar vegna styttingar þeirra var svikið. Fleiri hundruð milljónir verða hrifsaðir úr skólunum á næstu árum. Komið hefur í ljós að hér var um sparnaðaraðgerð að ræða en ekki áform um að bæta skólastarf í landinu,“ sagði Logi.

Sagði ríkisstjórnina hunsa vilja þjóðarinnar þegar það kæmi að heilbrigðismálum

Þá gagnrýndi hann jafnframt stefnu ríkisstjórnarinnar í heilbrigðismálum og sagði hana hunsa vilja þjóðarinnar í málaflokknum. Þannig vildu 92 prósent þjóðarinnar aukna fjármuni í heilbrigðiskerfið og 86 prósent vildu reka félagslegt heilbrigðiskerfi.

„Opinbera heilbrigðiskerfinu er haldið við sultarmörk meðan fjármunir renna ljúflega í einkarekstur, án þess að sýnt sé fram á hagkvæmi slíks. Þar er kraninn opinn. Ríkisstjórnin tilbúinn að borga eftir hendinni þegar læknar í einkarekstri senda reikning en opinberum stofnunum sagt að hagræða. Landspítalinn er orðinn svo heit kartafla að stjórnin getur ekki haldið á henni. Hún ræður ekki við reksturinn; sér þá einu lausn að setja pólitíska agenta yfir stjórn spítalans til að fela vandræðagang sinn. Þrátt fyrir þá staðreynd að margt sé vel gert í heilbrigðismálum er æpandi sú staðreynd að þeim fjölgar sem sleppa því að sækja sér læknisþjónustu vegna kostnaðar,“ sagði formaður Samfylkingarinnar.

Samkennd og samhjálp birtist í samneyslunni

Logi gagnrýndi einnig önnur einkavæðingaráform ríkisstjórnarinnar, til að mynda þegar kæmi að sameiningu Fjölbrautaskólans í Ármúla við Tækniskólann og mögulega einkavæðingu hluta Keflavíkurflugvallar.

„Sífellt fleiri alþjóðlegar rannsóknir að aukinn jöfnuður sé farsælasta leiðin til að skapa kraftmikið samfélag velsældar og friðar. Það er því óþolandi að ríkisstjórnin noti ekki skattkerfið og markaðstengd auðlindagjöld til þess að auka jöfnuð og gefa öllum tækifæri til þátttöku. Í fjármálaáætlun er meira að segja fullyrt að skattlagning sé andstæða frelsis. Hvaðan kemur sú undarlega hugmynd frú forseti?“

Logi sagði að þvert á móti skapaði samneyslan flestum landsmönnum frelsi og tryggði stærstum hluta almennings áhyggjulítið og innihaldsríkt líf.

„Því fullyrði ég á móti: Skattgreiðslur eru skynsamlegasta fjárfesting langflestra Íslendinga á ævinni. Í samneyslunni birtist það fallegasta í mannlífinu; samkennd og samhjálp.“