Árásin í London: Lík hins franska Xavier Thomas fannst í Thames

Lögregla í London, sem leitað hefur Frakkans Xavier Thomas frá hryðjuverkaárásinni í London á laugardag, hefur fundið lík hans í ánni Thames.

Breska rannsóknarlögreglan segir lík hans hafa fundist í ánni nærri Limestone í gærkvöldi. Er búið að upplýsa aðstandendur hans þó að enn eigi eftir að bera formlega kennsl á líkið. Thomas varð 45 ára gamall.

Sjö manns létu lífið og tugir særðust í hryðjuverkaárásinni þar sem þrír menn óku sendiferðabíl á gangandi vegfarendur á London Bridge og fóru svo út og stungu fólk sem urðu á vegi þeirra við Borough Market á laugardagskvöldið.

Lögregla hafði skotið þá alla til bana innan við átta mínútum frá því að fyrsta tilkynning um árásina barst.