Mörg lið á eftir henni en Díana valdi ÍBV

Eyjamenn fengu mikinn liðstyrk í gær fyrir kvennaliðið sitt þegar Díana Kristín Sigmarsdóttir skrifaði undir samning við ÍBV.

Díana er tuttugu og tveggja ára örvhent skytta og kemur frá Fjölni þar sem hún hefur spilað síðastliðin tvö tímabil.

Díana skrifaði undir tveggja ára samning við ÍBV á 900 Grillhús í Vestmannaeyjum í gær.

Fjölnir spilar í Olís-deild kvenna á næsta tímabili en Grafarvogsliðið verður að gera það án sín markahæsta leikmanns. Díana skoraði 191 mark í 21 leik með Fjölni í 1. deildinni í vetur eða 9,1 mark að meðaltali í leik.

Tímabilið á undan lék Díana Kristín með Fjölni í Olís-deildinni og skoraði þá 202 mörk í 25 leik eða 8,1 mark að meðaltali í leik.  Díana skoraði þá meðal annars 14 mörk þegar Fjölnir mætti ÍBV út í Eyjum og Eyjamenn vita því að þeir eru að fá frábæran leikmann.

„Það voru mörg lið á eftir henni og því er Það mikið gleðiefni fyrir félagið að hafa tryggt sér krafta markamaskínunnar og vonum við svo sannarlega að hún muni njóta sín í nýju liði,“ segir í frétt um félagsskiptin á heimasíðu ÍBV.